Shillong: U myntri ka tnad pynroi nongkyndong ka jylla u bah Sosthenus Sohtun ula kam ba ka ain bylla sngi 125 sngi kaba thymmai, ka Viksit Bharat – Guarantee for Rozgar and Ajeevika Mission (Gramin) (VB–G RAM G) kaba la wanrah ka sorkar pdeng kan kham iarap bad kham shai ha ka jingtreikam bad kan kham pynsuk ia ki nongkyndong.
Haba kren mynta ka sngi, u bah Sosthenes ula ong ba lada don kano kano ka jingpyndonkam bakla ia ka pisa, kan iarap ia ki briew kumjuh ia kiba don job card bad ia ki VEC ban peitngor ia ki kam ba kan long kaba shai ban pynthikna ba kano kano ka kam kaba pyntrei kan long kaba biang.
Ula ong ba la bthah ia ki BDO ba kin ai ka jingbthah kaba bniah khnang ba kan ym don ka jingpyndonkam bakla.
Hynrei kawei kaba sngewkhia ka dei ka jingbym biang ki network mobile bad kane ka la buh jingeh namar ba ia ki jingdonkam la leh da ka online.
U myntri ula ong ba ka sorkar jylla ka hap ban pyntreikam ia ki ain ba la mynjur ka sorkar India bad ha kaba iadei bad kane ka ain thymmai, ka sorkar jylla kam ktah eiei ia ka pla pisa ka jylla watla ka dei 10 percent la 90 percent. U la ong ba ha kane ka ain thymmai, 90 percent ka jinglut thied tiar la bei ka sorkar pdeng bad 90 percent ka bai bylla ruh la bei ka sorkar pdeng katba ka sorkar jylla ka hap ban siew tang 10 percent ia ka bai bylla bad 10 percent ia ka bai tiar.
Ha kane ka ain thymmai, ban pynbha ia ki ïing skul ruh lah ban pynbha ban shna ym tang ia ki kam kiba iadei bad ka kam rep kam riang, kam iada ia ka mariang, pynneh ia ki umbam umdih bad ia ki lynti syngkieng.
Ha ki snem ba la dep, ka jingmang pisa ka long tang 1500 klur eiei hynrei ha kane ka ain thymmai ka jingmang pisa kan kiew sha ka 2000 klur eiei bad kane kan iarap shuh kham bun ia ki paidbah.
Ka ain bylla thymmai 125 sngi ka kham shai| 90 percent bah khlieh ka sorkar pdeng ia ka bai tiar & bai bylla, ong u myntri
