Shillong: U myntri rangbah u Conrad Sangma mynta ka sngi ula plie ia ka Meghalayan Age Pavilion kaba T.11.52 klur ha Nan Polok. Kane ka Pavilion ne ka jingtei kan long ka rynsan ban pyni sarong ia ka riti dustur, ka bam ka dih, ki tiar tynrai na kane ka jylla bad ki sap ki phong kum ka rwai ka siaw.
Kane ka jingtei Pavilion ka ieng ha ka jaka kaba heh 16,000 sq ft, ha kaba kan long kum ka rynsan ban die ia ki tiar ki tar, ki jingbam jingdih, ki tiar shna kti bad kiwei.
Ha kane ka prokram la sam ruh ia ka shithi mang pisa sha ki 16 ngut ki nongseng kam kiba ioh dukan ha katei ka Pavilion. Ia ka restaurant la aiti sha ka nongjop ia ka Hills on a Plate ka Adonijah Lyngdoh, katba ia ka Fruit Wine Experience Centre la aiti sha ka Meghalaya Fruit Wine Makers’ Association.
Kane ka Pavilion ka dei ka jingthmu ka sorkar ban pynwan dur ia ka sor Shillong na ka bynta ban pyndonkam ia ka jaka sorkar na ka bynta ka jingmyntoi ki paidbah.