Shillong: Ka jingialang kitbok kitrwiang ka VPP ia u kyrtong MP jongka, u Dr. Batskhem Myrboh ha madan Polo ha ka sngi Saitjain ka la phah ia ka khubor kaba khlain sha kiwei ki seng sain pyrthei ha kane ka jylla khamtam ia ka NPP kaba synshar mynta.
Ka jingwan poi bun ki briew sha kane ka jingialang ban ai ka jingkyrshan ia u kyrtong ka VPP, ka la kdew ba ka VPP ka lah ban bat biang wat ia ka shuki MP na Shillong Parliamentary constituency sha Lok Sabha, watla ka NPP kaba synshar ka la ioh ia u kyrtong uba la ih bha ha ka bor pyrkhat pyrdain bad ka UDP kaba sei ia u nongsaid ain uba la rben bha ki snem ha ki kam ain bad kam iarap ia kiba bun.
Ym lah ban tip thikna, hynrei haba shu antad, ka jingdon ki paidbah ba wan ban kitbok ia u kyrtong MP ka VPP, ka la bun hajar bha. Ka jingmih ka bai kynshew pisa na ki paidbah ba noh synniang katba lah, ka la kot haduh 3 lak tam. Lehse, ha kiwei ki party kam long kumne ba ki paidbah kin wan ban noh synniang pisa hynrei kiba bun ki ap thap ban ai pynban.
Ka jingsynshar ka VPP ha KHADC kam pat lah ban pynngeit ia u paidbah ba ka la leh ia ka bym dei hynrei ki ap khmih lynti ia u 2028 kaba dei ka elekshon MLA, ban tip thikna ia ka bor ka jingkhlain ka VPP.
Mynta ka VPP ka don 4 ngut ki MLA lait noh uwei u MLA uba shah sospon bad 26 ngut ki MDC kynthup 17 ngut ha KHADC bad 8 ngut ha JHADC.
Khynniuh kiwei ki seng sain pyrthei na ka jingialang kitbok u Prah ia u kyrtong MP
