Shillong: Ka District Magistrate, ka East Khasi Hills District, Shillong ka la pynjari da ka kyndon 163 BNSS, 2023 da kaba maham tyngeh ban wanrah dohkha na ri Bangladesh, ban pyllang, ban die ne ban shalan ia ki dohkha na Bangladesh khlem ki kot ki sla kiba biang lane da kaba pyndonkam ia ki kali, ki jhad, ki lieng, ne wanrah da u briew, kynhun ne iarap ban pynpoi ia ki dohkha da kaba beain ha baroh ki bynta ka East Khasi Hills.
Kane ka hukum ban khang pyrshah ban wanrah dohkha na Bangladesh, ka long hadien ba la ioh jingtip ba ka la don ka jingwanrah dohkha, ka jingshalan dohkha kaba beain, lyngba ki wah, ki surok bad kiwei ki lad sha ki iew ki hat hapoh ka jylla Meghalaya. Ka DC ka la ong ba kane ka la pynkhein ia ka Customs, Import-Export bad ka jinglong shngain ha ka jingbam jingdih namar ba ka lah ban dei ki dohkha kiba don jingpang ruh, kaba lah ban buh jingma ia ki paidbah nongbam.
Kino kino kiba pynkhein ia ka hukum, kin sa shah tan ha ka ain katkum ka kyndon 223 ka BNS, 2023 bad kiwei kyndon ain jong ka Customs Act, Foreigners Act, Passport Act bad kiwei.
Kane ka hukum kan treikam noh mardor, la ong ka DC.
Wat wanrah dohkha na Bangladesh ioh shah tan khak ha ka ain, maham ka DC
