Shillong: Ia ka shlem hikai kynjatbol ka Football Academy kaba la pyniaid da ka Lawei Sports Club Sawsymper, East Khasi Hills District la plie mynta ka sngi, 5 tarik Jymmang 2025 ryngkat ka jingsnoh kti lang ka Ïaitylli Sports Groups Lumshyiap.
Ia kane ka shlem la plie u MLA ka thain u bah Olland Sing Suin ha Madan Sawsymper.
Ka Lawei Sports Club Sawsymper ka plie ia kane ka Football Academy ha Sawsymper na ka bynta ban ai jinghikai ia ki khynnah rit hapdeng ka rta hapoh 8 snem bad hapoh 17 snem khnang ban pynmih ia ki rangialehkai kiba kynsai kum ki Messi, ki Ronaldo kiba pawnam ha ka pyrthei.
Ki don 149 ngut ki khynnah kiba ai kyrteng ban shah pyntbit ialade ha kane ka Football Academy kaba don ha Sawsymper.
Kum kane ka Football Academy ka dei ka sien ba nyngkong ban don ha katei ka thain.
Ha kane ka sngi u bah Ollan Singh Suiñ u wan da ka Local taxi ban wan plie pyrda ia kane ka Football Academy bad ula ai sngewbha ruh ia kane ka Lawei Sports Club da ki Ball.
Shi bynta kum ka dak ka jingkmen ban ioh plie ia kane ka shlem, la ioh ruh ia ka jingialehkai ki khynnah, ka jingshad sngewbha na ki samla.