Shillong: Ka sorkar pdeng ka la bthah ia ki jylla bapher bapher ka ri ba kin pyllong ia ka jingiada lada wan ka thma ne ka war mock drill ha ka sngi Balang, ka 7 tarik Jymmang khnang ban iada lada wan ka thma, ha kaba ka India ka don ka jingiakynad mynta bad ka ri Pakistan hadien ka jingshah siat iap ki 26 ngut ki nongleitkai ha Pahalgam, Jammu & Kashmir ha ka 22 tarik u Iaiong ba la dep.
Ha kane ka jinghikai ban iada haba wan ka thma, yn pyni ia ka jingpah siren na suin bad ka jinghikai ia ki paidbah ban iada ialade.
Kiwei ki jinghikai ki long ban iada haba ka por ba pyndum tliw tliw, ka rukom rieh bad ka jingbuh ia ki tiar bad ka rukom phetrieh na ki jaka ba shah hiar thma.
U Myntri Rangbahduh ka ri u Narendra Modi ula pyllong bunsien ka jingialang bad ki heh shipai ka ri hadien ba ka jingjia ha Pahalgam ha kaba ka India ka la buhthong ban wad haduh ban da shem ia ki riew pyntriem wat shaduh ba kut kane ka sla khyndew.
Ka tnad kam pohiing ka ri ka la ban jur ia ka jingdonkam ka jingiashim bynta ki bor bapher bapher naduh ki pulit, ki bor shnong, ki bor district bad ki jaka pule bad ki pulit ban pynthikna ba kane ka jinghikai ban iada ia ka thma kan long kaba jop.
‘Da War Mock Drill’, bthah ka sorkad India ia ki jylla hapdeng ka jingiakynad bad ka Pakistan
