Shillong: U President ka NPP Meghalaya uba dei ruh u symbud myntri rangbah ka jylla bah Prestone Tynsong ula kam ba ka jingwad daw ka UDP ia ka NPP, ka lah ban dei namar ba ki don ka jingiahuri hura hapdeng jongki hi.
Ha kine ki sngi, ka la don ka jingkynnoh na ka UDP ia ka NPP ba ka la shu thom bad kam sngap kam burom wat haba don lang ha ka sorkar ha ki kam ki jam wat ha ki konstitwensi kiba mihkhmat ki MLA ka UDP ruh.
Haba kren mynta ka sngi u bah Prestone ula ong ba ka don ka jingialang ka MDA ha kaba la don lut ki MLA jong ki party kiba don lang ha ka sorkar, bad kano kano ka jingeh ki lah ban iakren ha kane ka jingialang bad ki lah ruh ban pynsngew ia u myntri rangbah, ne sha ki symbud myntri rangbah bad sha ki myntri lada ki shem kano kano ka jingeh khnang ban pynbeit.
Ha kajuh ka por, ula kyntait ba kan don kano kano ka jingktah iaka NPP lada ki MLA ka UDP kin rung sha ka BJP ruh namar ba ka NPP ka la poi ha u number jadu ne magic number ban thaw sorkar bad kam don kano kano ka jingktah lada ki MLA ka UDP ki leit rung sha ka BJP.
Ula ong ba ka donkam 31 ngut ban ialam sorkar marwei hynrei ka NPP ka la ioh 33 ngut ki MLA ha ka ing kaba don 60 ngut ki MLA, kaba la pahuh bad lah ban thaw hi marwei khlem da donkam ia kiwei ruh bad ka la lah ban jam sha shiliang ka jingkieng.
U la ong ba la iohi ha ki khubor ba ki don ki MLA ka UDP kiba ong ban rung sha ka BJP bad na ka liang jongu, um lah ban ong eiei namar ba ka dei ka kam jongki hynrei ka sorkar ka khlain bad yn pyndep haduh ba kut kane ka samoi.
Lah ban kdew ba kumba 9 ngut eiei ki MLA ka UDP kila paw ba ki lah ban leit iasoh sha ka BJP lada ka jingiakren ka poi sha ka bynta kaba iahap.
Ka NPP ka la ioh u number jadu, wad daw ka UDP ia ka NPP ba ki iaphoi para maki
