Shillong: Kawei ka jaka jngohkai kan sa khring ia ki nongwankai pyrthei ha ki sngi ban wan bad kane ka jaka jngohkai ka khampher namar ba la ker da ki lumbah baroh ar liang ha ka wah bad la iohi shynna bha tang sha sahit bneng.
Ha kane ka sngi Thohdieng, shi kynhun ki rangbah kila hiar lyngba ki khlaw ki btap, ki riat ki rain bad ki them ki lum ban sorjamin ne sorbe ia kane ka jaka jngohkai, kaba bteng na u Mawryngkhang sha pieng Tharia ha ka wah Umnup.
Kane ka pieng ne ka pung Tharia ka don harum ka pung nguid briew kaba ju jer ki briew ka thain Wahkhen bad ki don ki pung shibun ha katei ka thain kiba jylliew bad krem bha.
Ha ka lynti iaid ban poi sha kane ka jaka, la lap ia u mawngap uba ju shongkai ki shrieh, ka krem ba ju rieh ki khiat ki skei bad ki jyrmi kiba heh kyllain kum ki bsein kiba lah wat ban tan ia ki kali ruh.
Ha katei ka wah, ki don ki dohwah khamtam ki khasaw ha kaba ki rawon ki ju tuid ban leit khwai tangba ka jaka ka long kaba kham eh ban iaid namar bala ker da ki riar bad tang ki briew katei ka thain ki tip ban iaid na ki jaka ba lait.