Shillong: Ka jingshna ia ka surokbah 206 Shillong-Pynursla-Dawki ha ka bynta ba kham jwat harum Laitlyngkot ter ter haduh Lyngkyrdem ka la sdang khih biang ha kine ki aiom ba la duna slap.
Mynta ka sngi, ha ka jingiaid lynti u nonglum khubor, la iohi ba u lum bah ha shnong Laitkynsew, la dep pom tbuk ban pynbeit ia kane ka surokbah, katba kiwei ki bynta kiba dang bun kiba dang kham I ma, ym pat ktah khamtam ha shwa ban poi ha shnong Pomlum ha ka lad ban leit sha shnong Wahkhen.
Ha ki bnai kiba la dep, ka leit ka wan ha ka thain Pynursla ka la ktah jur hadien ba ka la don ka jingtwa bad ka jinghap khyndew na ka jingiaid ka jingpynheh ia ka surok.
Ka la don ruh ka jingdkut ka surok tbuk hajan shnong Laitkynsew na ka jingjynrat ka um kaba la ktah kumba shi bnai tam ia ka leit ka wan sha katei ka thain.