Shillong: Saw ngut ki runar kila kyllon iap ha ka jingiather kuli bad ki pulit ka Meghalaya ha Songsak, East Garo Hills mynta ka sngi.
Ha ka kyrwoh u SP ka East Garo Hills u Pawar Swapniasantrao ula ong ba hadien ba la ioh jingtip kaba thikna ia ka jingthmu kine ki runar ban rahbor ia ki nongtrei ka National Highway and Infrastructure Development Corporation Limited (NHIDCL), ki pulit ka Anti-Terror Sqaud (ATS) ryngkat ki pulit ka East Garo bad Songsak Police Station, kila pyllong ia ka jingpynap shrip dang step phyrngab mynta ka sngi. Katba ki pulit ki dang pynap ha surok Dagal-Songsak ha ka por kumba 4baje mynstep, kawei ka kali Bolero number AS01 FD-2889 bad ki pulit kila ai dak ba ka dei ban sangeh hynrei ha kata ka por, kine ki runar kila synreit kuli pynban sha ki pulit haduh ba ka kali pulit ka la julor bad ha kata ka por hi, ki pulit kila pynphai kylla kaba lah neh katto katne minit.
Hadien kane, ki pulit kila leit ban peit ia ka kali bad la don saw ngut ki briew kiba la mynsaw jur bad la pynkit sha Songsak PHC bad nangne la pynkit sha Williamnagar Civil Hospital ban sumar hynrei ki doctor kila pynbna ba la kila iap lypa shwa ban poi ha hospital.
Kine saw ngut kiba la iap la ithuh kyrteng kum u Alason Marak, uba dei na Mendima, ka North Garo Hils uba shah kynnoh donkti ruh ha ka jingsiat ia u nongkhaii dang shen ha Damra, u Sustom Rabha, uba dei na Goalpara, Assam uba don ki kam runar ha Dudhnoi, Mendipathar bad Dadenggre Police Station nalor kiwei ki kam tuh kam thiem bad la pynngat ha Arms Act, u Kalam Ali, uba na Goalpara, Assam, uba don ki kam runar ha Krishnai PS ban rahbor, dawa pisa bad pynmynsaw briew bad u Bobidul Islam, uba na Goalpara, Assam.
Na ka met jongki, ki pulit kila ioh tam 2 tylli ki pistol kawei kaba thoh Beretta.
Na ka liang u SP ula kyntu ia ki paidbah ban ym pynsaphriang ia ki khubor bym shisha.
Ki dang thmu ban rahbor ia ki nongtrei ka NHIDCL, shah siat iap 4 ngut ki nonglute
