Shillong: Ka jingialang ka KSU bad ka sorkar jylla mynta ka sngi, ka la rai ba ka sorkar jylla kan ialam ia ki nongialam ka KSU ban leit kynduh ia u myntri ka sorkar pdeng ba peit ia ka tnad ka koit khiah halor ki mat jingdawa ka KSU namar ba ka sorkar jylla kam lah ban tuklar namar ba ka dei shabar ka bor jongka.
U myntri sorkar uba dei ruh u nongaiktien u bah Paul Lyngdoh uba pyniaid ia ka jingialang, u la ong ba ki don 5 tylli ki mat ba ka KSU ka la buh hakhmat bad kita ki kynthup ia ka rta rung kam, ka bhah ia ki nurse kynthei bad shynrang, Computer Base Test, ka jingbym biang ka bhah ia ki ST bad ban pyniaid ia ka eksmin da ka NEIGRIHMS.
Kane ka jingleit kynduh kan long shen ha kine ki sngi. Kawei pat ka long ba ka Governing Council ka NEIGRIHMS kaba khlieh ka myntri ka tnad ka koit ka khiah ha kaba la rai ba ia kine ki mat yn rah ha kane ka Governing Council ha kaba kan shim ia ka rai ban phah pat sha ka tnad ka koit ka khiah ka sorkar pdeng.
Halor ka jingpyntreikam ia ka Roster thungkam, ka KSU bad ka bor pyniaid ka NEIGRIHMS kin shong jingialang lashai ban iathir ia kane.
Halor kane, ka NEIGRIHMS ka la rai ba kan pynsangeh shwa ia ka jingthungkam haduh ban lah ban pynbeit ia kane ka kynrum kynram, bad halor kane ka KSU ka la mynjur ban sangeh shwa ia ka jingiakhih khlem buh por kaba ki la pyllong la kumba san sngi kynthih ha phyllaw ka NEIGRIHMS.
Yn ialam ka sorkar jylla ia ka KSU ban kynduh ia u myntri ka sorkar pdeng halor ka NEIGRIHMS
