Shillong: U myntri sorkar jylla uba dei ruh u nongaiktien ka sorkar u bah Wailadmiki Shylla u la pyntip mynta ka sngi ba ka sorkar jylla mynta ka sngi lyngba ka cabinet ka la thied jaka shuh sa 3.81 lak square phut ha Mawkhanu ha Knowledge City ha ka dor kaba la kot sha ka 13. 78 klur.
Kawei pat la pynjlan ia u bah BM Syiem kum u Executive Director ka (Technical), Meghalaya Infrastructure Development Finance Corporation (MIDFC) sa ar snem.
La mynjur ia ki kyndon ka Meghalaya Industrial Promotion Investment Scheme ban pyniaid sted ia ka skhim.
Kawei pat ka dei la mynjur ia u Justice Wanlura Diengdoh kum u President ka Meghalaya State Consumer Redressal Commission, katba ia ka kam Chairperson ka CIC la thung ia ka kong Ripnar Lyngdoh, IAS barim.
Ha kaba iadei bad ka Meghalaya Integrated Transport Project, (MITP) – Revision of Project Cost, la mynjur ban pynlah ia ka sorkar ban ioh jingmyntoi na ka jingiakylliang ia ka dor ne exchange rate lyngba ka jingmynjur ka tnad ka sorkar India kaban ai jingmyntoi kumba ₹160 klur ia ka jylla na ki projek.
Ka cabinet kala mynjur ruh ban pynkiew ia ka jingmang pisa ia ki projek shan surok kaba la bei ka World Bank na ka jingkiew ka GST.
La mynjur ruh ia ka jingpynkynriah ia ka DVOR na ka bynta ka jingpynheh ia ka Shillong Airport ban ai wai ia ka jaka ha shnong Umktieh, Ri-Bhoi District sha ka Airports Authority of India (AAI) ban pynkynriah ia ka DVOR navigation system.
La pynkylla ruh ia ka Meghalaya Minor Mineral Concession Rules, 2016 ban ailad ban khlong marpoh khyndew haduh shiteng akar ka jaka.
Ka cabinet ka la mynjur ruh ban ai wai 19.99 akar ka jaka ha Mawkhanu, New Shillong, sha ka Northeast United FC na bynta 45 snem ban buh ia ka football academy.
Ka jingmang pisa ban wan bei kane ka club kan long ₹40–50 klur eiei.