Shillong: Ki briew ha thain khappud ka India bad ka Bangladesh kiba hap ha ka Nongjri bad ka Umniuh-Tmar Elaka hapoh ka Pynursla Civil Sub-Division, East Khasi Hills kila kynduh mawsiang na ka jingwan rung beain ki briew na shiliang pud ka Bangladesh.
Ar ngut ki Sirdar, kynthup u bah Philinto Rynjah jong ka Nongjri Elaka bad u bah Premier Sing Khongbeh jong ka Umniuh-Tmar Elaka, kila iathuh ba ka jinglong jingman ha khappud ka long syier bha namar ka jingjyllei palat ki briew na shiliang pud, kata na ri Bangladesh ban rung beain sha India bad ban leh ia ki kam tuh kam thiem, bad wat ban buh jingma ia ka jingim briew.
Kine ki sirdar kila pynpaw ba ka jingker sainar shiah ka sorkar India ban khang lad ia ka jingwan tuh ki briew na shiliang pud, na Bangladesh, kam don jingmut satia hynrei ka la pynduh ei pynban ia ki bri ki bsah jong ki brew na India.
Ka jingker sainar ne fencing kam ai jingshngain eiei ia ki briew namar ba ki nonglute, ki nongtuh na Bangladesh ki rung na ki paip ba shna muri ne homepipe, na ki wah, bad ki kiew wat na sainar shiah ruh.
Lada ka sorkar India ka kwah shisha ban khang lad, ka dei ban shna da ka jingker kum ka Great Wall ka China, lym kumta, kam don jingmut ka jingker sainar shiah namar ba kam ai jingshngain eiei ia ki briew ha khappud.
Ki la sngewkhia jur ruh ia ka jingbym ler ki BSF ban iada ia ka khappud bad ia ki briew ka India. La kynnoh ba ki BSF ha jaka ban iada ia ki Khasi, ki ju beh, ju brthen pynban haba leit ban ujor katba ia ki briew na Bangla haba iohi ki iaid ruh kim leh eiei.
Ka iew khappud ne ka Haat ha kine ki sngi, ka la khang syndon sbak, haduh ba ki briew kila mad shibun ki jingeh ha ka kamai kajih bad kane ka la pyllong ia kiba bun ban wan krih sha sor bad sha kiwei ki jaka ban wad bam wad kamai.
Ha ka jingshisha, kine ki ar tylli ki Elaka kila buddien ia kane ka iew border haat na ki tnad sorkar jylla bad ka sorkar India ruh hynrei haduh mynta khlem poi shano shano ruh.