Shillong: Ka jingialang ka bor sorkar, ki rangbah shnong bad ki nongshong shnong ka thain Laban, Lawsohtun ka la khluit tar mynta ka janmiet halor ka Ropeway Lum Shyllong kaba jrong 913 metre ha ka jinglut kaba T.151 klur.
Na ka liang ka sorkar ka la pynshai bin pa bin ia ki nongrim bad ki daw ki mat kiba la wanrah ia katei ka projek kam jngohkai. Ki rangbah shnong ruh hapoh ka lama ka Raid Laban Dorbar Pyllun kila kyrshan ia kane ka projek ha kaba kila kam ba la dep ban khot ia ka jingialang iasyllok bad ki nongshong shnong shwa ban wan kane ka projek.
Hynrei na ka liang ka Joint Action Committee (JAC) ka la pyrshah jur ia kane ka projek bad ka la kynnoh ruh ba ki rangbah shnong katei ka thain Laban, Lawsohtun ki khlem khot ia ka jingsngap paidbah ne public hearing.
Kane ka la mih ka jingiapyni nia mar kylliang hapdeng ki nongkitkam shnong bad ki nongialam ka JAC haduh ba kila mih syndon blait sha bar na katei ka jaka kaba long jingialang ban pynpaw ia ka jingpyrshah.
Hadien kane, u Commissioner & Secretary ka tnad jngohkai u bah Cyril Diengdoh haba kren sha ki lad pathai khubor u la ong ba ka sorkar kam shym la leh thurmur ia kane ka projek hynrei ka la iaid bin ba bin bad thik pa thik ia ki kyndon ain khamtam kiba iadei bad ka mariang bad hadien ba la pynthikna ba ki tyllong um, ki dieng kin ym ktah na kane ka projek bad ruh hadien ba la ioh ia ka jingbit na ki tnad bapher bapher ba la iaid shakhmat.
Shwa ia kane, u ophisar na ka MIG u bah Aiban Swer ula pynshai ba la leh ia ka jingiasyllok bad ki nongshong shnong, hynrei ym donkam ban leh ia ka jingsngap paidbah ne public hearing namar ba katei ka jaka ban pyniaid ropeway ka dei jong ka sorkar bad kam dei jaka shimet kumba long kiwei ki jaka shimet. La leh ia ka jingiasyllok bad ki nongshong shnong kiba don sawdong ban shah ktah na katei ka projek.