Shillong: Ha kine ki sngi, bun ki rawon ki ju shongshit bha ban leit sha ka jingiakop khwai ha ki pung ba shna ki briew ba shu theh dohkha, ha kaba la pynshah da ki khusnam da ki phew lak bad ki ieh ruh ia ki kam ki jam ban leit beh sha ka jingkhwai dohkha da kaba phoh sniew ban ioh ia ki phew lak.
Hynrei mynta ngi la leit peit ban sakhi ia ka jingiakop khwai ha ka wah kaba la shna hi ka mariang na ka bynta kawei ka dawbah, kata ka long ban iada ia ki kynja ba im ha ki wah bad ka mariang bad kane ka dei ka wah Mawkylla kaba peit lang ki ar tylli ki Hima, kata ka Nongjri bad ka Umniuh-Tmar Elaka, kiba don ha khappud ka India bad ka Bangladesh ha thain ri war.
Shi bynta ban iada, ban pynneh bad ban pynroi ia ki dohkha dohum, ar tylli ki Elaka, kila pyllong ia ka jingiakop khwai dohkha ha katei ka wah Mawkylla ha kane ka 20 tarik Risaw 2026 ha kaba kumba 100 ngut ki rawon kynthei bad shynrang kila tuid sha katei ka wah. Ia ki nongjop la thew da ka jingngat bun ki dohkha bad ia ka jingsam khusnam la pyllong ha jingkieng ka Wah Mawkylla.
La ioh ban iakren ia ki 2 ngut ki sirdar jong kine ki Elaka, kynthup u Sirdar bah Philinto Rynjah jong ka Nongjri bad bah Premier Sing Khongbeh jong ka Umniuh-Tmar, kiba la batai ba ka daw kaba pyllong ia ki ban shim ia kane ka sienjam ka long ban iada ia katei ka wah, kaba la shah pynjot dusmon ha ki briew ha kine ki snem ba la leit. Ka dei ruh shi bynta ban ai ka jingpynshai bad pynsngewthuh ia ki paidbah ia ka jingdonkam ban iada ia ki wah ki um bad ka mariang.
La iathuh ba namar ba ka dei ka wah kaba long u pud hapdeng kine ki ar tylli Elaka, la thaw ia ka Joint Action Committee (JAC) ban iada ia ka wah ha kaba ki ar tylli ki Elaka kila buh da ki nongsyntiat ban bat ia kiba pynkhein bad ban aiti sha ka ain ia kiba leh pyrshah.
Shi bynta ban khring ia ki briew ban wan peit kai ia ka jingitynnad ka thain khappud, kine ki ar tylli ki Elaka kila don ruh ka jingthmu ban pyllong ia katei ka jaka kaban khring ia ki nongwankai ne tourist namar ba ka don ka mariang ba itynnad bad khamtam ba ka don hajan bad ka Bangladesh.