Shillong: Ka jingiakop pynmareh kulai ka dei kaba pawnam tam ha thain West Khasi Hills, kaba don naduh hyndai bah hynrei katba nang iaid ka juk, ka la jan jah pynban.
Shi bynta halor kane, ka bor district ka West Khasi Hills ka la pyllong ia ka jingiakop pynmareh kulai ha ka sngi Thohdieng ha madan pynthor kaba jrong tam ha North East ha shnong Mynni Mawbri ryngkat ka tnad jngohkai ka jylla, ka Haikai Travels bad ka Mynni Mawbri Multipurpose Primary Agricultural Credit Cooperative Society Ltd.
Ha katei ka madan ka Mynni Mawbri la pyllong ruh ia ka jingiakop pynher kot kudi.
Ha ka jingiakop mareh kulai, u kulai ba ai kyrteng kum u Thup ba u Kynsaiborlang Wahlang na shnong Nongdom hajan Umyiap bad uba wan baar u dei u Thup Rit ba niah u bah Wosligen Wahlang na Mawiawet bad balai la ioh u kulai ba ai kyrteng u Nika ba niah u Eric Kharbani.
Ha ka jingiakop, ki don kumba 10 tylli eiei ki kulai kiba wan iashim bynta kynthup ki nongniah kiba la rangbah bad kiba dang khynnah.
Katba ha ka jingiakop ia ka jingpyni ia ka dur bad ka jinglong ka met u kulai, la ioh u Kulai Saw jong u bah Sabut Wahlang, bud sa u Lai Lieh jong u bah Pleindar Sangriang, bad u Koh Mut jong u bah Beindinglan L. Marshillong.
Ha ka jingiakop pynher kot kudi, la rah u Zachary Khongtim uba la pynher kumba 800 metre sha suin bad her khlem hap khyndew haduh ka por bala buh, bud sa u Jubilathmu Mawlieh bad ka kot kudi kaba heh tam la ioh u Khraw Mawlieh.
Ha ka prokram la don lang u Superintendent of Police, West Khasi Hills District, bah Herbert Kharkongor, u bah R. Kharkongor, Block Development Officer (BDO), Mawshynrut, bah Marc A. N. Diengdoh, Tourist Officer, Nongstoin bad ki nongkitkam shnong ka Mynni Mawbri bala sakhi ruh ki paidbah byllein.
Haba iakren bad u Sordar ka Mynni Mawbri u bah Karland Shangoi ula ong ba ka jingpyllong ia kane ka jingiakop pynmareh kulai ka long shi bynta na ka jingthmu ban pynkhie im bad pynpawnam biang ia kane ka jingialehkai kaba naduh hyndai, kaba la sdang ban jah pynban mynta.
Ula ong ba ka dei ruh shi bynta ka jingpyrshang ka shnong ban kyntiew ia ka kam jngohkai ha katei ka shnong kaba don shibun ki jingbuh ba itynnad ka mariang, kum ki wah, ki lum, ki pynthor, ki madan bad kiwei.