Shillong: U MP barim ka Rajya Sabha u Dr. WR Kharlukhi ula ong ba ki MLA ka UDP kiba leit sha ka BJP kin iakynduh kajuh kumba jia ia ki MLA ka Congress kiba leit sha ka TMC ha u 2023 shwa ka elekshon MLA ha 2024.
U Dr. Kharlukhi ula mih noh na ka NPP ha ki bnai ba la dep bad mynta ka sngi, ula pynbna paidbah ban kyrshan ia u kyrtong MP ka Congress u Bah Vincent H Pala.
Haba kren sha ki lad pathai khubor mynta ka sngi, u Dr. Kharlukhi ula ong ba ha u snem 2023, ula ong ba ki paidbah ka jylla kin ai ia ka jubab ia ki MLA ka UDP kiba leit sha BJP kumba ki jubab ia ki MLA ka Congress kiba leit sha ka TMC.
Ha kajuh ka por ula ong ba ula mih na ka party NPP da ka rai shimet bad haba u rai ban kyrshan ia u bah Pala ka dei ka rai lajong.
Ula kam ruh ba ka jingrung ki MLA sha ka NPP, ka kren da kumwei ha ka rai u paidbah ha madan namar ba ha ka MP elekshon na Tura ka NPP ka shah rem bad kumjuh na Shillong Parliamentary konstitwensi.
Ha kawei ka liang, u la ong ba haba u mih na ka NPP, um kynnoh iano iano namar kiba kynnoh ia kiwei, ki dei kiba tasngeng bad u la ong ba lada shah beh ruh un ym mih hynrei lada dei ka por ban mih, yn mih hi.
Haba batai ia ka daw kaba la shah tan ban kyrshan ia u bah Pala, u Dr. Kharlukhi ula ong ba ka ain FCRA ka la pyllong ia u ban kyrshan ia ka Congress hadien ba ka la ieng pyrshah ia ka jingthmu ban syngit ia kane ka ain pyrshah ia ki kynhun niam.
Ula ong ba lada jop u bah Pala, ka Congress kan kiew ka jingdon MP sha ka 99 ngut ban iakhun pyrshah ia ka BJP.
Na ka liang u bah Pala ula pynpaw ia ka jingsngew heh mynsiem hadien ba la wan ai jingkyrshan u Dr. Kharlukhi bad ula pdiang sngewbha ia ka jingwan kyrshan jong u.