Shillong: Hadien kumba shi taiew eiei ba shah sospen ha ka Voice of the People Party (VPP), u MLA ka VPP na North Shillong u bah Adelbert Nongrum ula ong ba u kwah ban kren shai ba um ym hun, um pdiang ia kaei ba ka party ka la leh ia u ban sospen bad 4 ngut kiwei pat.
Haba kren mynta ka sngi, u bah Adelbert u la ong ba u long uba iai shah, bad u kyntu ia ki nongialam ka party ba kin khot iakren markhmat haba shit haba shai kum ki rangbah kampher lada ka don ka jingshah sospen. U la ong ba lada bakla u kloi ban pan mab ban nguh ban dem ia kita ki briew kiba kwah ia u ban panmab hynrei lada bakla ma ki, un shu ong klet bad mab noh.
U Bah Adelbert ula kwah ban ong ia ki nongialam ka party ba ki kam ba ka dei ka nongrim blei, ki kam ka politik kaba khuid, ki kam ban pynkut ka jingsngew baheh hynrei tang kawei u kwah ban ong, ba u blei u iohi lut tangba u ap.
U la ong ba shwa ka elekshon MDC, ula ong ia u President ka VPP ban khot iakren ia u bad kiwei namar bym kwah shuh ban don ka jingiapait iapra hynrei u President u ong ba um don por bad u sngew lyngngoh ba ka jingshim rai jongki ban sospon ka long kumba la beh. Ha ka jingshisha, um kwah ban mih na ka party lymda don ka dawbah bym lah shuh. U la ong ba ha ka jingshisha ki ong ba ym ba halor ban ia ka party hynrei ha u ha kaba iadei bad ki mat, ka jingiatip lem ka kham khraw ban ia ka ain. Ula pynpaw ba u sngew khia ia kiba ieid ba thoin bad ki samla kiba shaniah bad kyrshan ia u khamtam ha ka konstitwensi kiba la kyrshan san tylli ka elekshon ha ka MLA bad MDC namar ba um ju iapein ia ki mat bad ula kyntu ia ki paidbah ba kin ym sngew diaw namar ba watla u shah khang ban kren ha ka kyrteng ka Voice of the People Party hynrei un kren kum ka Voice of People.
U la ong ba u rung sha ka VPP halor ka nongrim bad khlem rung ban pan tiket hynrei u rung hadien ba ka VPP ka pdiang ia ka Reservation Policy bad ula kyntu ia ki paidbah ban ym shongshit biej. U la ong ba ka Reservation Policy kam dei ka mat jong u hynrei ka dei jong ki samla ka jylla. Ula kren ban ai ka jingtyrwa halor ka Roster System, halor ka bhah ia kiba duna ka ioh ka kot bad kiba riew spah namar kumno u khun u MLA un iakhun ia kajuh ka kyrdan bad u khun ba die waidong, hato ki riew shemphang ka party kim sngewthuh. “Lada ia ka soskular jong ka jaitbynriew, la pynkhein kumno ngan shaniah ia ki. Nga khlem mih na ka party hynrei nga khlem kaei kaei kaban pynbudnam ia ka party hynrei nga leh ban kyntiew ia ka jaitbynriew bad ia ka party. Tang kawei nga kwah ban ong ka long ba ngam pyrshah ia ka party hynrei nga pyrshah ia ka rukom pyniaid”, la ong u bah Adelbert.
“Lada nga pyrshah party, ngan jin ban mih na ka party ban leit kyrshan shawei. Shwa ban thep vote, nga dang kren ba ma nga bad ka iing ka sem ngin kyrshan ia u Prah ”, la ong u bah Adelbert. U la bynrap, “Hato ka long pyrshah party, hato ka dei tang ka jingai daw, Nga la ong lai sien ha ka jingialang ka party ba lada phi wit ia nga, ym donkam ban sospen ne show cause, shu beh beit”.
U bah Adelbert u ong ba ki lah ban kynthoh ban bein ia u hynrei kampher namar ba ula dep mad ia kum kine ha ki snem ba la leit ruh ha ka por ba u ieng ban pynneh ia ka KHNAM, ha ka por ba u wanrah ia ka Reservation Policy ha u 2022 ruh kila phet lut na iing dorbar don tang u Myntri Rangbah, symbud myntri rangbah bad u nongialam liangpyrshah bad kiwei ki wan rung tang ha ka por ba shim ia ka rai hooid ne em hynrei mynta ki la iakren lut bad ai jingmut lut ia kane ka mat. U la kren ruh ia ka jingshah kdiah ka iktiar ki rangbah shnong ha kaba u shah thngan 17 sngi ha u mot u Woh Kiang Nangbah, hajan Civil Hospital, Shillong bad la wan ki nongtyrwa pisa haduh 6 klur hynrei u la kren shai ha ki, ba ka lynti ba un sangeh ban shah thngan ha kato ka por, ka long mynjur noh ia ka VAB lane shu sei ia ka met iap jong u. “Nga la iaid ha ka jingshah kren bein, hynrei ngam sngewpher, nga la iaid ha ka jingshah tynjuh ban nang phrang shuh ia nga, lada ban iatyngkhuh bad ka party ruh, ngan buh ia ka jaitbynriew hakhmat, ia ka party hadien”, la ong u bah Adelbert.
U la ong ba kim (VPP) nud ban khot iakren ia u namar ba ki tieng ba ka jingshisha kan pynmong ia ki hynrei ka jingshisha kan pyllait luid.
Lada nga bakla ngan panmab, lada bakla ma ki, ngan shu ong, klet bad mab: Adelbert
