Shillong: U Waheh Shnong ka Lapangab, u bah Deimonmi Lyngdoh ula ong ba lada ka sorkar jylla Meghalaya kam leh da ki kam kumba ka la kular naduh lashai ka sngi, ka shnong kan sa shim ia ki lad ba kham tyngeh.
Mynta ka sngi, ki paidbah nongshong shnong ka Lapangab, West Jaintia Hills kila wan tur puk sha Secretariat ha Shillong ban dawa na ka sorkar ba kan ai ka jingshngain ia ki paidbah nongrep kiba la shah pyndik ha kiwei ki briew ryngkat ka jingsynran lang ki pulit ka Assam.
U Waheh Chnong ula ong ba ha ka jingiakren bad u symbud myntri rangbah bah Sniawbhalang Dhar uba dei ruh u MLA ka thain, ula ong ba ka sorkar kan ai ka jingsynran lang ia ki paidbah ban leit rep naduh lashai ka sngi bad lada kam long kumba la khlei ka ktien, ka dorbar shnong kan shim da ka rai ba kham jubor.
Shwa ia kane, ki paidbah nongshong shnong ka Lapangab kila wan tur lymbung sha Secretariat ban dawa na ka sorkar ba kan ai ka jingiada ia ki hadien ba kila shah pyndik ir shi ir man ka por na kiwei ki briew na Assam haduh ba kim nud shuh ban leit rep sha ki lyngkha jongki.
Lada ka sorkar kam leh kumba ka kular naduh lashai, ngin shim kiba kham tyngeh: Waheh Chnong ka Lapangab
