Shillong: U President ka NPP Meghalaya bah Prestone Tynsong ula kam ba u MP ula ioh kren tang 5 minit ha Parliament namar ba u leit na ka party kaba bym don jingiadei bad kiwei pat hynrei lada ioh u Dr. DRL Nonglait un sa ioh kren ym duna ia ka shi kynta namar ba kiwei ki paralok MP kin ai bhah lang ia ka por jongki.
Ia kane u la ong haba kren ha ka jingsdang ka jingialap elekshon ia u kyrtong ka NPP u Dr. DRL Nonglait ha shnong Nongshillong, kaba hap ha Mawthadraishan konstitwensi.
U bah Prestone uba dei ruh u symbud myntri rangbah ka jylla ula ong ba u ynda la ioh kren u Dr. DRL Nonglait shi kynta ha Parliament, la thikna ba ka ktien Khasi kan rung syndon ha Khyrnit ba phra ka riti synshar ka ri bad ka Inner Line Permit (ILP) ruh kan urlong.
Ha kajuh ka por, u bah Prestone ula iaroh ia u Dr. DRL Nonglait ba u dei u briew uba u la don ka jingtbit ha ka rukom pyniaid kam.
Hynrei ha kajuh ka por, u la ther ia kiwei da kaba, ba ba don ki briew kiba bang bha ka nia ka thyllieh ha surok hynrei da shong ha ka ophis, ki leh kulmar, teng teng shu suspen briew, teng teng shu beh kam, hynrei ka kashari ka pynsangeh, kane ka paw ba ka dei ka jingbym pat shemphang bad khlem ka jingtbit, haba shong kali hap kylli ia u driver, uba don jingtbit ne em namar ba lada shu shong kali ba niah bym pat tbit, mut ban leit sha Shillong, ioh poi pynban sha Civil hospital.
U la ong ba haba ym pat don jingshemphang, kaba eh ban wanrah ia kaba kren ha surok ban pyntreikam ha ophis.
Haba iaroh ia Dr. Rock, u bah Prestone ula ong ba u Dr. DRL Nonglait u dei uba la bam lyndet ia ka kam synshar bad ula kyntu ia ki paidbah ban ym pynlehnoh ei ia u DRL Nonglait, uba la iaid lut naduh ba u dang phong patlun lyngkot u bym ioh slipar haduh ba un deng tie ha NEHU.
Ula ong ruh ba u jingmih madan u Dr. DRL Nonglait ban iakhun ia ka MP elekshon, ka dei ka jingjied kaba kynja Blei kaba pasiaw ha une u rangbah ban shim ia ka ticket.
U MP u ioh kren tang 5 minit | u Dr. DRL un ioh kren 1 kynta ha Parliament, ka ILP, ktien Khasi kan urlong: Prestone
