Shillong, Naitung 12: Ka jingïalang pynrung dkhot jong ka Voice of the People Party (VPP) ha ka sngi Thohdieng ïa kaba la pynlong ha phyllaw ka Tirot Sing Memorial Hall, Mairang la sakhi ïa ka jingpynïasnoh sha ka party da ki bun spah ngut ki paidbah.
Haba ïakren bad ki katto katne ki riew paidbah ki la pynpaw ba ka jingshim rai jong ki ban pynïasnoh sha ka VPP ka daw hi ka dei namar ki ïohi ba dei tang kane ka party kaba long ka jingkyrmen ia ka lawei jong ka dong ka thaiñ, ka ri bad ka jaidbynriew baroh kawei.
Ki la pynpaw ruh ba wat lada ka VPP kam shym la lah ban leh bha ha kane ka elekshon kaba la dep hynrei na ka liang jong ki ki la rai ba mynta ka kynti ban pynjop don burom ïa uno uno ruh u kyrtong ba ka VPP ka sei.
“Ngin shaniah beit ha ka party ïano kan sei hynrei ngi te ngi la rai ban pynjop beit noh ia u Prah ha kane ka elekshon MDC ban wan,” ong ki katto katne ngut ki longkmie.