Shillong: U Symbud Myntri Rangbah ka jylla uba dei peit ia ka tnad kam pohiing u bah Prestone Tynsong ula ai jingmut ia ki nongialam ka Voice of the People Party (VPP) ba kin leit iakynduh ia u lada kwah jingshai halor ka jingthung ia u DGP ka jylla, ym ban kren sha ki lad pathai.
Haba kren mynta ka sngi, u bah Prestone ula ong ba shwa ban kren sha ki lad pathai khubor, ka VPP ka dei ban wad jingtip shwa bad ula khot ia ki nongialam ban wan kynduh ia u ba un pynshai namar ba kam don jingmut ban shu kren sha lad pathai khubor khlem ka jingtip kaba biang.
Lah ban kdew ba ka VPP ka la dawa ba ka sorkar jylla ka dei ban pynshai paidbah balei ka pynslem ban khot ia ka Empanelment Committee Meeting (ECM) ban pynkhreh ban thung ia u DGP ba thymmai hadien ba la kut ka samoi jong ka DGP ba mynta ha ki sngi ban wan.
Ka VPP ka la pynpaw ia ka jingsngewkhia halor ka jingbym lah ka sorkar ban phah ia ka jingtyrwa sha ka Union Public Service Commission (UPSC) ban khot ia ka Empanelment Committee Meeting (ECM) ban pynkhreh ia ka jingthung ia u Director General of Police (DGP) thymmai jong ka jylla.
U nongaiktien ka VPP u Dr. Airpeace Well Rani ha ka kyrwoh ula ong ba ka UPSC ka la phah jingthoh ha ka 24 tarik Nailur 2026 sha ka sorkar jylla ban pynkynmaw hynrei ka khlem ioh jubab satia, kaba la pyllong ba kan pynkynmaw biang ia ka sorkar jylla ban bud ryntih ia ki jingbthah ka Supreme Court.
Ka VPP ka dawa ba ka sorkar jylla Meghalaya ka dei ban pynshai ia ki daw kaba la pyllong ban pynslem ia ka jingpynkhreh ban jied ia u DGP ba thymmai jong ka jylla.