Shillong: Ha ka jingkylla ka sain pyrthei ne ka politik ha ka jylla Meghalaya, ka seng BJP kaba ju shah kyntait beit ha ki paidbah man ka elekshon ha kane ka jylla kaba kiba bun ki nongshong shnong ki Khristan, mynta ka kynti ka la kiew kynsan sha ka ar number ne double digit, sha ka 10 ngut hadien ba 8 ngut ki MLA ka UDP kila long khreh ban rung sha kane ka seng.
Ka la shai kdar mynta ba baroh 8 ngut ki MLA ka UDP kin leit rung sha ka BJP. Shi bynta jong kane ka jingthmu, ki MLA ka UDP kila pyllong ia ka jingiasyllok ia ki nongkyrshan, ia ki nongkitkam bad ki paidbah ka konstitwensi ha kine ki sngi.
Nyngkong u MLA ka Shella u bah Balajied Synrem ula khot iasyllok ia ki nongkyrshan ha Sohra dang shen ha kaba ki nongkyrshan, ki nongialam kila bynshet ha ka jingstad u MLA ban leh tangba ka dei ban long na ka bynta ka jingmyntoi ka jaitbynriew bad ka roi ka par ka konstitwensi.
Kumjuh u MLA ka Khliehriat bah Kyrmen Shylla ula ioh ia ka jingkyrshan na ki paidbah ka Konstitwensi ba un leit sha ka BJP na ka bynta ban pyllait noh ia ka jingkhang tih dewiong ha ka jingialang kaba long ha Byndihati, ha kane ka sngi Balang.
Ha kajuh ka por, u MLA ka Mawphlang u bah Matthew Beyondstar Kurbah ula khot ia ka jingialang bad ki paidbah ha kaneka sngi Balang ha Mawngap ha kaba ki paidbah kila rai ba un iaid shakhmat halor kane ka jingthmu ban leit rung sha ka BJP.
Katkum ka jingtip, lada kam don ka jingbakla da kumwei pat, u myntri ka tnad kam pohiing ka ri u Amit Shah u lah ban wan iuhkjat hi dalade sha Shillong ha ka 24 tarik mynta u bnai ban pynkup lama BJP ia kine ki MLA bad ban pynbna ruh halor ki mat ba ka BJP kan leh kiba la buh da ki MLA ka UDP.
Ki 8 ngut ki MLA ka UDP kiba la khreh ban rung ki long bah Lahkmen Rymbui na Amlarem, bah Pius Marwein na Ranikor, bah Mayralbon Syiem na Nongpoh, bah Balajied Synrem na Shella, bah Olan Singh Suin na Mawsynram, bah Kyrmen Shylla na Khliehriat, bah Synshakupar L Thabah na Sohiong, bad bah Matthew Beyonstar Kurbah na Mawphlang.