Shillong: Ka sorkar jylla ka la ujor ejahar pyrshah ia ka KHADC kaba la leit khang tala ia ka camp jong ka kompeni kaba la buh ban peit ia ka jinglong jingman ka projek shwa ban sdang ia ka kam.
Haba kren mynta ka sngi, ka Commissioner & Secretary ka tnad jngohkai ka jylla, ka kong Rosettt Mary Kurbah ka la ong ba ka sorkar ka hap ban ujor ejahar pyrshah ia kiba wan iuhroit ia ka jaka ka sorkar.
Hynnin ka sngi ka KHADC ha ka jingdon lang u CEM u bah Winston Tony Lyngdoh ka la leit khang tala ia ka camp jong ka kompeni ha Riat Laban halor ka nongrim ba kam pat ioh ia ka trading license.
Haba kren mynta ka sngi, ka kong Rosette ka la ong ba naduh 2022 pynkhreh ia katei ka projek bad, la buh maw nongrim ha 2024 bad la pyllong ia ka jingiasyllok ha Lum Shat Sngi bad ki dorbar shnong halor kane.
Ka la ong ba ka don ar bynta ne terminal ha katei ka projek, kawei ka bynta kaba don shalor ka hap ha ka jingpeit ka Dorbar Raid Laban katba ka bynta kaba shapoh, ka hap ha ka jaka jong ka sorkar jylla. Ha kane ka bynta ba shapoh la buh ia ka camp ban peit ia kaba iadei bad ka jingiada ia ka mariang bad ban peit ia ka jinglong shngain ki nongtrei bad ka jingtrei kam pat sdang wat tang shi prek ruh haduh mynta.
Ka la ong ba u kontraktor uba ioh ia ka jingtrei la pan trading License na ka KHADC ha u Jymmang ba la dep hadien ba la ioh ia ka NOC na ka Raid Laban bad la phah ruh ban shim NOC na Syiem Mylliem bad u Syiem Mylliem ula buh ia ki kyndon ban pynbiang. Ka KHADC ka la pan jubab ha u Naitung bad u kontraktor ula dep jubab sha ka KHADC ha u Nailur. U kontraktor ula ioh ia ka NOC na Dorbar Myntri ka 5 Kur 11 Kur Riat Laban bad na ka Hima Mylliem.
Ka kong Rosette ka la ong ba katei ka jaka kaba shah khang tala, ka dei jong ka sorkar bad haba don mano mano ba wan iuhroit ia ka hok ka sorkar, hap ban ujor da ka ejahar namar ba ki wan ban rung jubor.
Ka la ong ba katkum ka 32 (2) ka Meghalaya Ropeway Act 2022, ka shah ban leh ia ka jingpynkhreh shwa ban pyntreikam ia ka projek. Ka kam khlem pat sdang satia. La ujor ejahar katkum ka sakhi satar.
Ha kajuh ka por, ka la ong ba ka jingiakren ka dang iaid bad kiba pyrshah ban pynsngewthuh halor kane ka projek bad ka dei ia ka Raid Laban bad kam iadei bad kiwei ki shnong ki thaw.
Ka la ong ruh ba watla u Lum Shyllong u dei u jaka pyllang um hynrei kane ka projek kam don eiei kaban ktah ia ki bynta jong kane ka bynta bad ia kane la pynshisha da ki stad na PHE, Municipal bad kiwei ki tnad mariang.