Shillong: Shillong, Nailar 06: Mynta ka sngi, ka Voice of the People Party (VPP) ka la pyllong ia ka jingiaid paidbah kaba jai jai sawdong ka Secretariat na ka bynta ban pynsngew ia ka sorkar ia ki 10 tylli ki mat.
Kine ki 10 tylli ki mat ki long ban pyndam ia ka projek ha Lumpongdeng bad pynmih da ka White Paper, ban pyllong ia ka thungkam kaba khuid ha ka MPSC, DSC, ban weng ia ki polisi pyrshah ia ki nonghikai, ban sangeh ban thungkam ia kiba la shongthait, 5. sangeh ia ka jinglilam ia ka khyndew, iada ia ki nongshong shnong ha khappud, ban sangeh ia ki karkhana shna coke bad dewbilat, jurip bad beh noh ia ki mynder ba shong beain, weng ia ka jingkhang dewiong bad ailad ia baroh ban tih dewiong katkum ka ain bad ban weng noh ia ka jingkhang tih maw tih shyiap ha ka jylla bad wanrah ia ki ain kiba iahap dur bad ka mariang ki briew jong kane ka jylla.
Ia kane ka jingiaid paidbah, la ialam u President rangbah ka VPP u bah Ardent Miller Basaiawmoit ha kaba la sdang ban iaid naduh lad Civil Hospital, Shillong ter ter sha IGP bad sha DC ophis, sha BSNL ophis bad tawiar iaka Secretariat.
Da ki hajar ngut ki paidbah kila iaid ryngkat ki plakad, ka jingkynhoi risa, bad pyndem ia ka sorkar MDA.
U bah Ardent ula ong ba kane ka jingwan tuid ki paidbah ban iashim bynta ha ka rally, kan dei ka khubor kaba tyngeh sha ka sorkar ba ka dei ban pyndep ia ki mat ba la pynsngew bad ula maham ba lada ka sorkar ka dang iai kuman, ka sienjam shakhmat kan dang ap.
Haba kren sha ki lad pathai khubor, u bah Ardent ula ong ba kim donkam ban buh por ia ka sorkar ban leh ia kine ki mat hynrei ka dei ka kamram hi ka sorkar ban leh shisien ba la pynsngew bad ula byrthen ba kane ka dei ka jingsdang lada ka sorkar kam sngap, yn shim sa kiwei ki sienjam nangne shakhmat.
“Ka daw kaba pyllong ia ngi ban mih sha madan, ka dei namar ba ha dorbar ruh kim ai lad kaba biang ban iakren bad ki jingthoh ba la ai sha ka sorkar ruh ki sngap man man, kim ju ai ia ka jubab”, la ong u bah Ardent.
Khynniuh ir ka Secretariat ba iaid rally ka VPP halor 10 tylli ki mat
