Shillong: Ki don kumba 1 lak 50 hajar ngut ki nongthep vote ki bym thikna ki lah ban shah mait kyrteng noh na ka thup nongthep vote ha ka jylla Meghalaya.
Kane ka long hadien ba ka tnad Election Commission of India (ECI) ka la pyllong ia ka jingpeit kyrpang biang ia ki nongthep vote ne ka Special Intensive Revision (SIR) ha ka ri kynthup ha kane ka jylla.
U Chief Electoral Officer (CEO) ka Meghalaya, u B.D.R. Tiwari, u la pyntip ba 1,49,656 ngut ki nongthep vote kaba kot sha ka 6.37 persen, la buh ha ka kyrdan ASDD. Na kine, 74,851 ngut ki la ïap,37,914 ngut ki la shong shnong shawei, 28,826 ngut kim shym la don ha ïing, 5,899 ngut ki don ar tylli ha ka thup, bad 2,166 ngut ki la kyntait ban pyndap ïa ka Enumeration Form.
Ka East Khasi Hills ka don bun tam kiban shah mait haduh 49,778 tylli ki case, bud sa ka West Garo Hills da 26,864 tylli.
U la ong ba yn leh ïa baroh kine katkum ki kyndon jong ka Registration of Electoral Rules, 1960, hadien ka jingpynshisha kaba pura bad da kaba ai lad ïa kiba dei hok ban pynshai.
Ula ong ruh ba palat 2.24 lak ngut ki nongthep vote ha jylla la ithuh ba ki hap hapoh ka kyrdan “No Mapping” ha ka jingpynbeit thymmai ïa ka thup kyrteng nongthep vote. Ïa kine ki briew yn dang bishar bniah ha ka por ba plie ïa ka jingpdiang ïa ki jingkyrpad bad jingïakam.
La sam ïa ki Enumeration Form 23,40,764 tylli na ka bynta 23,49,645 ngut ki nongthep vote, kaba kot sha ka 99.62 % ha ka jylla.
Ka Election Commission ka la buh ïa ka 29 tarik Naitung kum ka sngi kaba khatduh ban aiti ïa ki Enumeration Form bad kito ki bym aiti ïa la ki form hapoh kane ka por, yn ym kynthup ïa ki kyrteng jong ki ha ka Draft Electoral Roll kaban sa pynmih paidbah ha ka 5 tarik Nailar, 2026.
2 lak duna yn shah mait kyrteng ki nongthep vote bym thikna ha ka jylla | 2 hajar tam ki bym treh pyndap form
