Shillong: Ka Hynñiewtrep Youths’ Council (HYC) mynta ka sngi balang kala ujor u Lat jong ka jylla Meghalaya u CH Vijayashankar uba long ruh u Chief Rector jong ka NEHU, ban dawa tuklar halor ka jingthung u Vice-Chancellor ha North-Eastern Hill University (NEHU) da u professor ba kham khynnah ha kaba katkum ka rule, dei ban thung da u professor uba la rangbah tam.
U President ka HYC bah Roy Kupar Synrem ula ong ba katkum ka rule ban thung VC, dei ban long da uno uno u professor uba rangbah tam ban long kum u in-charge ia ka NEHU. Hynrei ka Ministry of Education, Sorkar Pdeng ha ka 22 tarik Naitung 2026, ka President jong ka Ri kala ai jingmynjur pynban ia ka kam Vice-Chancellor shipor ha u Prof. Saroj Kanta Barik na ka Department of Botany, uba kham duna snem ha ka jinglong rangbah kum u Professor ha NEHU.
U bah Roy ula ong katkum Statute 2(A) Clause (2) jong ki Statutes jong ka NEHU ba la pynkylla ha u 2013, la ong shai ba, “U Vice-Chancellor ba kut ka por un dei ban aiti ia ka kam ha u Professor ba tymmen eh ne u most senior professor, lada ym pat don u Vice-Chancellor bathymmai.”
U bah Roykupar ula ong ba u Professor uba la rangbah tam ha NEHU, dei u Prof. R Khongsdir na ka department ka Anthropology. Ula ong ba ki khlem kynjoh ktien eiei ia u, ne ai kano kano ka jingthoh ba un shimti ne em hynrei kam don satia. Ula ong ba lada u Professor uba la rangbah tam um treh, lah ban shung ia uba kham khynnah.
Ula ong ba ka seng ka kwah ba ka NEHU kaba la sakhi ia ka jingkulmar la katto katne snem, ka dei ban pyniaid katkum ka ain.