Shillong: Ka kynhun ki dkhot bad nongialam ka Congress Meghalaya mynta ka janmiet ka la leit rah plakad hakhmat ka khyrdop u Lat ka jylla ha Lok Bhavan, Shillong ban pynpaw ia ka jingkyrshan ia ka jingiakhih ki samla ha nongbah Delhi, kaba ialam ka party Niangkalaw ka CJP.
Haba kren sha ki lad pathai khubor, u nongialam ka Congress bah Banphiralang Basaiawmoit ula ong ba ka jingwan rah plakad ha katei ka jaka ka long ban pynrem ia ka jingshah thombor ki samla pule ka ri, ha kaba kim don shuh ka jingshaniah ha ka rukom treikam kane ka sorkar BJP.
Ula ong ba kane ka jingwan ka long ka jingsngew kthang bad ka jingpangnud haba iohi ia ka jingshah bom shah tied bad shah kem ki samla pule bad wat ia ki MP ruh la shah patan.
U la kynnoh ba kane ka dei ka jingleh ban thombor ia ka sur jong u paidbah kaba long pyrshah iaka synshar paidbah.
Ula ong, “ki samla pule ki dei ban iamih ryntih halor kane ka jingshah thombor ki samla, kaban kah dum ia ka lawei jongki”.
Ki pulit kila wan ban pynsngew ha ki nongialam ka Congress ba kim dei ban khang lynti sha Lok Bhavan.
Lah ban kdew ba mynta ka sngi, ki MP ka liangpyrshah kynthup u Rahul Gandhi kila shah patan ha ki pulit namar ba ki leit ban pyllong ia ka jingiakhih hakhmat iing sah u Myntri Rangbahduh ka ri u Narendra Modi.
Ka Congress ka la kyrshan ia ka jingdawa ka party Naingkalaw ne ka CJP ba u myntri ka tnad pule puthi u dei ban hiar shuki noh mardor halor ka jinglait tuh ka jingkylla ka NEET, kaba la pynduh ia ka jingshaniah jong ki samla pule.
Shiteng miet, leit rah plakad ka Congress hakhmat khyrdop u Lat ban kyrshan ia ka jingiakhih ki samla ha Delhi
