Shillong: Ka seng Voice of the People Party (VPP) Youth Wing ka ai ka jingkyrshan ia ka jingiakhih jong ka seng Niangkalaw ne ka CJP kaba dang iaid mynta ha New Delhi.
Ha ka kyrwoh mynta ka sngi, ka VPP ka la ong ba ka jingiakhih kaba iadei bad ki mat pyrshah ia ka bamsap, ka jingleh shiliang bad ka jingtuklar ka bor sain pyrthei, kam ktah tang ia kano kano ka thain hynrei ka ktah ia ka lawei jong ka synshar paidbah bad ka synshar khadar ha ka ri India.
Kala ong ba ka VPP naduh ba la seng, ka la ieng skhem halor ka nongrim jong ka politik kaba khuid, ka jingsynshar kaba shai, bad ka jingtbit bad ka jingkhein jingdiah kaba shai ha ka jingim ba iadei bad u paidbah.
Ka bamsap bampong bad ka jingleh shiliang ka pyntlot ia ki shlem u paidbah, ka knieh ia ka hok kiba dei hok bad ka pynduh ia ka jingshaniah jong ki paidbah ha ka synshar paidbah.
Ka VPP namarkata, ka ieng halor ka nongrim ban ai ka jingkyrshan ia ka CJP bad ka la ieng ban ai ia ka jingkyrshan ia ka jingiakhih jong ka CJP pyrshah ia ka bamsap, ka jingleh shiliang bad ka jingpyllong politik ia ki shem synshar paidbah.
Ka la ong ruh ba ki samla ka Meghalaya ki donbok palat ban don ka seng sain pyrthei kum ka Voice of the People Party, kaba ieng na ka bynta ka jingangnud bad ka jingthrang jong ki paidbah.
Ka la ong ruh ba ka party kan sa pyllong ia ka jingiakhih paidbah katkum ka jingsynshar paidbah na ka bynta ka jingbit jingbiang ki samla bad ki paidbah ka jylla lada ka dawa ban leh kumta.
Kyrshan ka VPP Youth Wing ia ka jingiakhih ka party Niangkalaw
