Da Babu Kular Khongjirem
Hadien ka jingkhlad noh i Dr Ricky J Synkon, i sitting MP na Shillong Lok Sabha Constituency, iba ki paidbah ki da ieit bad burom bha shisha ia I bad kum u nongialam uba don shisha ka jingkyrmen ia ka ri bad ka jaitbynriew Khasi-Jaintia jongngi, mynta pat, ka la mih ka sur wur wur- wer wer shane shatai ba ka Party VPP ne party Prah ba ki ju khot, ka la sdang hiar noh arsut ka lyer(waves) jongka wat hapdeng ka bye-elekshon MP kaban sa long shen ha kine ki khyndiat bnai kiban sa wan.Ha ka jingshisha, kane ka samoi treikam u MP na Shillong seat(mid term poll) ka dang dei ka pali(turn) jong ka VPP lada dei ba dang im i Dr (L) Ricky J Synkon.
Ka jinghiar ka lyer VPP mynta ka sien,ki ong, ym dei eh ba kim trei shitom ki nongialam ka party, lymne ba ki ju pynap borti ne phriang jain tap moh man la ki jingialang paidbah ban ioh bai kynshew na ki paidbah ba wan meeting ha man la ki meeting ba ju ki ju leit pynlong,hynrei ka dei khamtam eh ha ka liang ka akor ka burom bad ba kim lah satia ban teh lakam ne synshar(control) ia ka ktien ka thylliej ba ki nongialam nong pynphriang khubor paidbah jongk(youtuber), ki ju kren man ka teng sha ki paidbah nongpeit bad nongsngap lyngba ki lad pathai khubor paidbah( social media). Kumno ka party kaba la bun ki nonghikai ba tbit,ki riew donburom suda, kaba ju ialap ruh(preached) ban pynkylla dur ia ka rukom im ki briew ka Ri Khasi -Jaintia kim lah satia ban teh lakam ia ki nongialam ba hakhmat jongka ban shu phah tim sih- tim sang, ban shu tla shu tlep da ki ‘tien sih ‘tien sang kiba,ha kiba sngap,(sngewbha map ianga), sngew kumba khlem phong sopti khlem phong patlun shuh.Ban plie channel ha kamra Tv khamtam haba ia don lang ki khun ki kti, kiba ha iing ha sem ne haba don lang ki khynnah skul ne samla pule la sngew lehrain bad jah burom hi khait ia ka rukom kren jong ki nongialam jong kane ka party ba ki la pynphriang(spread/interpret) lyngba ki youtube ne social media jongki.
Ngi ju sneng barabor ha ing ha sem,ha lynti ha syngkien haduh ha ki jaka pule ba, ban pyndonkam ia ki ktien sniew ktien smeh,horkit hordang kalong kaba sang ban pyndonkam. Ban pynshlur (encouraged) bad ai mynsiem ia ki ktien sniew khamtam ha ki lad khubor ba ia sngap paidbah kam long satia kaba dei. Ha ka jingshisha,”La duk- la suk,la rit la ria khampher,dei ban ri ban sumar bad bat kyndong ia la ka burom “. Ka Burom kaba tam ha kane ka pyrthei.Lada bakla ka burom ka akor,ka ktien ka thylliej,kata la kylla ‘riewkai ei kha-ma-kha.Lada phi nang phi stad katno katno ruh, lada phi don ka spah shi pyrthei ruh ne phi nang ban kren ki ktien kiba thiang kum ka um ngap(good lip service), hynrei lada phim don ka akor ka burom, phim nang ban teh lakam ia la u thylliej,kam don jingmyntoi ei ei bad long lehnoh ei lut kita baroh.
Ha ki por ba long nongialam ki nongsynshar mynshwa kum jong I(L)B B Lyndoh, (L)Capt.W A Sangma,etc,ki ju mai ki ju sneng ia ki nongialam bad nong kyrshan jong ka party jongki ba kim bit satia da lei lei ruh ban pyndonkam ia ki ‘tiensih ‘tien sang.Ba kin tim kin tla lei lei, kata, ki la pynjah burom ym tang ia ki, kum ki nongialam hynrei ia ka party jongki baroh kawei ba ki la ialam.Kumno da ki nongialam party kin hikai,pynshlur bad ai mynsiem pynban ia ki nongkyrshan ban pyndonkam da ki ktien bym man haba iohsngew lang ki paidbah ba bun ba lang?
Nangne shakhmat,ki nongialam ba hakhmat ka party kidei ban sneng ban kraw noh bad ai jingmut ba ka khubor tla bad tim sih – tim sang dei ban pynsahngeh noh shi syndon (with immediate effect) da ki nongialam nongpynphriang khubor jongki, ba ioh ba,kiwei ki party liang pyrshah(political opponents) jongki , kin shim kabu ban sin ne khot pynban kum ka “Party Tla” ioh poi pynban sha ka jinghiar dor bad ka jingjah burom bad ka jingjem daw ym tang ia ki nongialam hynrei shaduh ki nong kyrshan ba lui lui kiba bapli( inocent voters) hakhmat ka pyrthei baroh.
Hato,! Duna lyer seh ka VPP mynta ka Sien?
