Shillong: U Vice President ka UDP uba dei ruh u kyrtong MP ha ka elekshon Lok Sabha ha ka 2024, u bah Robertjune Kharjahrin ula pyllait san shyieng noh tbuk bad ka seng United Democratic Party (UDP) hadien ba ula kam ba ka nongrim ka party ka la khyllem.
Ha ka shithi kaba la phah sha u President/ General Secretary ka UDP, u bah Robertjune ula ong ba da kaba sngewsih u la rai ban mih noh mardor na ka party kaba ula bat kum u Vice President bad kum u dkhot ka Central Executive Committee baroh shi katta.
Ha ka shithi, u la ong ba kum ka party ka dei ban ieng ha ka nongrim bad kam dei ban iapein ha ka jingshakri ia u paidbah ka jylla, bad kum u dkhot ka party ula trei borbah ban ieng ha ka nongrim ka party bad ban iada ia ka jingshaniah kaba u paidbah ula ai.
Hynrei ka rai jong ki MLA ka party dang shen ban kyrshan ia u kyrtong MP ka NPP sha Rajya Sabha, u James PK Sangma, khlem ka jingmynjur ka Central Executive Committee, ka la pyndum ngain ia u bad um lah ban iapein bad ka jingiatiplem ia kane ka lynti ba ka party ka la shim.
U bah Roberjune ula ong ba katba ka UDP ka dang pynkhreh ban iakhun ia ka elekshon MP sha Lok Sabha na Shillong Parliamentary constituency bad ban pan ia ka jingkyrshan na ki paidbah, ka jingleit kyrshan ia u kyrtong ka NPP ha ka Rajya Sabha, kan pynduh jingshaniah na ki paidbah bad kan ialam sha ka jingkulmar syndon plak. U la ong ba kane ka rai ka la pynjem khnap ia ka nongrim sain pyrthei bad ki paidbah ka jylla ki don ka hok ban ioh ia ka jingshai bad ka jinglong hok.
Ula ong ruh ba ym lah ban ong ia ki paidbah ban kyntait ia ka NPP ha kaba ha kawei ka liang pat, la nang ai sboh ia ka NPP bad kane kan pynring sdot ia ka jingshaniah ki paidbah ia ka UDP.
Kum u dkhot uba pyrshah ia ka politik shim kabu bad uba ieng na ka bynta ka nongrim ha ka jingim bad u paidbah, um lah ban sngap jar halor kane bad ban bat ia ka jingngeit ba skhem bad ban pynieng ia ka nongrim kaba ula ju ieng, u la rai ban risain noh na ka kam Vice President bad ruh kum u dkhot jong ka party.
Ula pynpaw ia ka jingsngewnguh ia ki paidbah, ki nongtrei party bad kiba ieid ba thoin kiba ula ioh ban iasam ha ka jingiaid lynti ha ka sain pyrthei bad un iai shakri ia ki paidbah ka Meghalaya na ka bynta ka jingbit jingbiang ki paidbah.
Pynkut noh u bah Robertjune bad ka UDP, ba ka la khyllem ki nongrim
