Shillong: U Amit Gehlot uba dei u Manager jong ka kynhun ñiah lieng ba na Shillong kaba ïashim bynta ha ka 1st Indian Sailing League u la ong ba ka jingïoh ban pynlong ïa kane ka League ha Meghalaya kadei lyngba ka Sorkar Jylla hapoh ka jingïalam u Myntri Rangbah ka Jylla u Conrad K Sangma, Myntri ka tnad Sports, bad kiwei ki ophisar kiba angnud ban kyntiew ïa ki jingïalehkai bapher bapher ha ka Jylla.
U Amit Gehlot uba dei ruh u dkhot jong ka Umiam Sailing Club, kaba ïatreilang bad ka tnad Tourism ban pynlong ïa kane ka jingïakop ñiah lieng, u la ong ba ka Jylla Meghalaya ka don ki samla kiba tbit ha ka jingïalehkai bad ha ki ar snem ka kynhun ka la ïoh haduh 10 tylli ki takma.
U la ong ruh ba baroh ki tip ïa ka jylla Meghalaya ha kaba ym ju lap kaba kum kane ka wah kaba khuid bad ka suiñbneng kaba pyngngad. U la ïathuh ba ki nong ñiah lieng na ki ri ka pyrthei kiba ïashim bynta ki kynthup na ka ri Russia, England, Taiwan, Sri Lanka, Malaysia nalor kiwei ki jylla jong ka ri India.
Ïa kane ka jingïakob ñiah lieng kaba la sdang ha ka sngi Thohdieng ka 27 tarik Lber bad kaban kut ha ka 31 tarik Lber 2026 la wan ban plie da u Myntri Rangbah ka Jylla u Conrad K Sangma.