Shillong: Mynta ka sngi u myntri rangbah u Conrad K Sangma ula plie ia ka tamasa jingbam khamtam kiba dei ki jingbam tynrai na kane ka jylla kaba ai kyrteng kym ka Culinary Cascade 2026 ha Nan Polok, Shillong.
Ia kane ka tamasa jingbam la pyllong ka tnad jngohkai ka jylla ryngkat ka jingiasyrdoh lang bad ka Meghalayan Age Ltd, MyMeG bad ka Chief Minister’s Meghalaya Grassroots Music Program.
Katkum ka jingong u myntri kane ka tamasa shet bad bam jingbam, kam mut ban shu bam hynrei ka dei ka rynsan na ka bynta ban kyntiew ia ka kam jngohkai kaba iadei bad ka bam ka dih khnang kyntiew ia ka ioh ka kot jong ki paidbah ka jylla.
Haba pynphai nia ia kito kiba wohnia ia ka jingpyllong ia ka tamasa, u Conrad ula ong ba ki tamasa kim dei ban shu leh sngewbha hynrei ka don ka bynta kaba khraw ban rah ia ka nam bad ka burom jongka jylla bad khamtam ha ka ioh ka kot jong ki nongshong shnong.
Ula ong ruh ba kane ka sorkar kam leh ia kaba thymmai hynrei ka shu pynjanai ia kaei kaba la ju leh naduh mynshwa.
Ha kane ka sngi, ula pynbna ruh ia ka Mission 1000 ban iakhun pyrshah ia ka jingduna bam ki briew ha jylla. Kane ka Mission 1000 kan phai khmat ban peit ia ka jingpynbiang bam ia ki khunlung naduh ba dang kha ha ka jylla.
Ha kane ka tamasa, u Conrad ula kawut bam ruh bad mad ia ka wine shi bynta ban pyndonkam bad kyntiew ia kane ka kam.
Kawut bam, sip wine u Conrad ha Nan Polok | Ka tamasa shet jingbam kam mut ban shu bam
