Shillong: Ka Shad Suk Mynsiem ka Seng Khasi Nongdom, Eastern West Khasi Hills District ka la kut ha ka 22 tarik Lber 2026 hadien lai sngi kynthih.
Ka shnong Nongdom ha Eastern West Khasi Hills ka dei kawei na ki shnong ha kaba kiba bun ki nongshong shnong ki dang bun kiba dang don ha ka niam Khasi tynrai hapdeng ka jingtynjuh jong ka por ha kine ki sngi.
Da ki spah ngut ki nongshad kynthei bad shynrang kila tuid ban iashim bynta ha kane ka shad ryngkat ki paidbah byllien ba wan ban sakhi.
U President ka Seng Khasi Nongdom bah Spilin Kharkylliang ula iathuh ba ia kane ka shad la pyllong naduh u snem 1982 haduh kine ki sngi. La pyllong ia kane ka shad shwa ban thung ban tep ia u symbai u rnai.
Ha kane ka shad la shah ban iashim bynta tang kiba don ha ka niam Khasi tynrai namar ba la pyndep ia ka knia ka khriam da ka nguh ka dem ia u blei trai kynrad shwa ban pyllong ia ka shad ka kmen.
U la ong ba ka Nongdom ka dei kawei na ki shnong kaba dang bun bha kiba dang bat ia ka niam tynrai bad ki sa leit ban pyniar ia ka tnad seng ban pynneh pynsah ia ka niam Tynrai bad kyntu ba kin iai bat bad pynneh ia ka riti dustur u Khasi kumba la seng ki longshwa manshwa.
Ka Nongdom kawei na ki shnong ba dang bat ia ka niam Khasi ha Eastern West | Shongkun ka shad suk mynsiem
