Shillong: U Symbud Myntri Rangbah ka jylla ba peit ia ka tnad District Council Affairs (DCA) u bah Prestone Tynsong ula ong ba ka jingkhot dorbar kyrpang jong u Lat ka jylla ia ka Garo Hills Autonomous District Council (GHADC) ka long ban wanrah ia ka jingpynkylla ne amendment ia ka ain AD Rules bad kawei pat ban mynjur ia ka mang tyngka.
Haba kren mynta ka sngi, u bah Prestone ula ong ba ka shong ha ka Executive Committee ka GHADC bad ka dorbar ba kin wanrah ia kaei ka jingpynkylla ne Amendment bad na ka liang jong u, um lah ban kren eiei namar ba ka dei ka kam jongki bad yn sa peit ynda kila mynjur haka dorbar.
Katkum ka jingtip, ka dorbar ka GHADC kan wanrah ia ka jingpynkylla ia ka AD Rules kaba 8 bad 128 jong ka Aassam and Meghalaya Autonomous Districts (Constitution of District Councils) Rules, 1951, khnang ban khang lad ia ki bar jylla ne non-tribal ban ioh iashim bynta ha ka elekshon jong ka District Council.
Lah ban kdew ba ka sorkar jylla ka la pynjlan ia ka samoi jong ka GHADC sa hynriew bnai kynthih. Ha ka jingshisha, ka sorkar ka la pynbna ban pyllong ia ka elekshon ban jied ia ki MDC sha ka GHADC hynrei ka la mih noh ka jingiakynad sngewpher jaitbynriew hadien ba la don ki bar jylla ne non-tribal kiba mih shakhmat ban leit thep kyrteng ban iakhun ia ka elekshon MDC, kaba la wanrah ka jingpyrshah jur na ki paidbah ka rilum Garo.
Ka dorbar GHADC ka long ban wanrah ia ka amendment bad ka mang tyngka, ong bah Prestone
