Shillong: U MLA ka Nongkrem u bah Ardent Miller Basaiawmoit ula ong ba ka kam khaïi drok ka kham shyrkhei ka jingioh nong ban ia ka jingkhaïi dewiong ha ka jylla bad ka jingma na ka jingpang HIV.
Haba kren hapoh ka ïing dorbar halor kane ka mat mynta ka sngi, u bah Ardent ula ong ba ka jingshyrkhei u drok haka jylla ka long ka jingma kaba shyrkhei ha kaba lada ym lah ban tehlakam, kan sa pynmih wat ia ki kynhun lehnoh drok.
Kaba sngew ma ka long ba ka la saphriang ha ki lad pathai khubor, ba kiba donkti ha kane kam pyniaid drok ki dei ruh ki pulit bad ka donkam ban tohkit bniah halor kane.
U bah Ardent ula ong ba ka jingpynjot na ka jingkharoi u drok, ka wanrah ka jingjot ia u nongdih, ia ka iing ka sem bad ka imlang sahlang. Katkum ka kaiphod, la don kumba 3 lak ngut ki nongdih drok ha ka jylla, kaba don 36 lak ki nongshong shnong.
Haba pynpaw ba ka sienjam ba la leh ka sorkar, kam long kaba biang, u bah Ardent ula ong ba ka sorkar ka la pyntreikam ia ka projek DREAM la katto katne snem hynrei kane kam shym la wanrah soh uba biang namar ba la nang kharoi pynban kiba pyndonkam ia u drok bad ka jaka pynkylla thymmai ia kiba ngop ruh ka long kaba rem dor bha kaba la buh jingeh ia ki longiing longsem.
U la ong ba ka jingpyllong ia ki tamasa da kaba die kyiad laitlan ka pynioh lad ruh ia ka jingpyndonkam ia u drok.
Ha kajuh ka por, ula kyntu ia ka sorkar ba kan shim ia ki sienjam ban tehlakam ia ka jingpang HIV, kaba la poi ha u dak ka jingma ha kane ka jylla ha ka jingdon ki briew kiba ioh ia kane ka jingpang. Ha jaka ban hikai ia ki briew ban pyndonkam da u condom, ka la dei ka por ban hikai shwa ia ki samla ban ym iathiah khlem da test shwa ia ka jingpang HIV, khnang ban lait na kane ka jingpang.
Ka donkam ban pynrung ia kane ka jinghikai ha ki skul khnang ba kin long kiba adkar bad sngewthuh na ka bynta ka lawei jongki bad ban lait na ka jinglong langknia.
Ha jaka u condom, dei ban test shwa ban iathiah: Ardent
