Shillong: Ka sorkar jylla ka la pynkhreh ban pynkhuid plain ia ki nongdie madan ban pynkynriah lut sha ki jaka ba la pynkhreh shwa ka 22 tarik Naitung.
U nongaiktien ka sorkar u bah Paul Lyngdoh ula ong ba ka rai ka High Court, Meghalaya ka la pynskhem ia ka sienjam ba la shim ka sorkar bad la khmih lynti shwa ka 22 tarik u Naitung, baroh ki nongdie madan kin bud ia ka jingbthah ka sorkar.
U myntri ula ong ba ha ki jaka ba la pynkynriah ia ki nongdie madan ha thain Khyndai Lad, yn pynitynnad bad pynkhuid ia ki jaka ban pynsngew tynnad ia ki paidbah bad ki nongwankai naduh Khyndai Lad sha Umsohsun bad kumjuh shaduh Jail Road.
U la ong ba kito kiba sah ha thain Khyndai Lad, kin ioh da ka car pass ban rung bad ban mih ki kali ha kaba kin rung bad kin mih katkum ka por ym ban shu iaid sahuh baroh shi sngi.
Ha kajuh ka por, u la ong ba hadien ba la dep pynkynriah ia ki nongdie madan na Khyndai Lad, yn leh sa sha kiwei ki jaka ka sor.
Lah ban kdew ba ka Meghalaya High Court, ha ka hukum kaba 3 tarik Naitung, 2025, ka la pynbeit por ia ki nongdie madan ba ki lah ban die tang naduh 12:30 haduh 2 pm bad naduh 7pm haduh 9pm hynrei kumba ka paw, ki nongdie madan kim burom ia kane ka hukum ka High Court bad kila phriang tiar naduh mynstep bad ki shong khlem khih satia ha ka thain Khyndai Lad.
Shwa ka 22 tarik yn pynkhuid plain ia ki nongdie madan na thain Khyndai Lad
