Shillong: U nongialam ka liangpyrshah u Dr. Mukul Sangma ula ong ba ka sorkar ka dei ban sei lut ka bor ka buit ban pynduh jait bad khang lad sbak ia ka jingwan rung u drok sha kane ka jylla.
Kane ka jingkren u Dr. Mukul ka long hadien ba uwei u nongwankai na Indore, Madhya Pradesh u la shah pyniap katba ka kurim jongu, ka dang jah rngai ha ka jingwan kai jongki sha Sohra.
Haba pynkynmaw ia ki kam ka sorkar jongu ban wanrah ia ka Shillong kaba shngain bad kumjuh ia ka ain MRSSA, u Dr. Mukul ula buh jingkylli hato ki Police Station ha ka jylla ki don em ki CCTV ba treikam 24X7 CCTV.
U la ong ba lada ka sorkar ka pynbiang ia ki tiar juk stad bad ki jingdonkam bad ka jingpyntreikam ia ka MRSSA, ka jinglong jingman kan long da kumwei.
Ula buh jingkylli balei ki khih khohreh ban buh CCTV mynta ynda la jia, kane ka pyni ba kim don ka jingshim khia.
Ka jingjia ha kompeni Star Cement ruh ka la jur ka dei namar ba ka jingkharoi u drok ban rung sha ki samla.
Bad ka jingjia ha Sohra ka lah ban jia ha ki jylla ki bym don ki kam pyntriem ruh.
U la ong ba kane ka sorkar ka ju mlien bha ban len bad ka jingiai ngop ki samla ha u drok, ka dei namar ba ka sorkar kam lah ban tehlakam ia ki nongkhaii drok kiba wanrah sha ka jylla ban kamai spah da kaba pynjot ia ki samla.
Ula ong ba ka donkam ba baroh ki jylla ha kane ka thain North East ba kin iatreilang ban pynkdiah tbak ia u kynjri jong ki briew kiba donkti ha ki kam pyniaid ia u drok, ym ban lapmiet ban leh politik.
Ba rung laitlan u drok, jur ki kam sniew kumba jia ha Sohra, Star Cement, ong u Dr. Mukul
