Shillong: Ka jingpyllong ka Khasi Students Union (KSU) ia ka Sngi Kyrsiew Ri ha Khliehriat, East Jaintia Hills ka la pyllong ia ki bar jylla ban khang dam lut ia ki dukan jongki ha ka thain Lad Rymbai ter ter. Ha ka jingshisha katei ka jaka ka dei kaba thnem bha ka iew ka hat, hynrei mynta ka sngi ka 4 tarik Iaiong 2025, ka la pjah slam na ka jingiaid ki kali bad ki dkhot ka KSU ban pyllong ia ka jingialang Kyrsiew Ri.
Ha ka jingshisha, ka bor district East Jaintia Hills kam shym la bthah ia ki trai ne nongshong dukan ban khang dukan hynrei ka la ai jingbit ia ka Khasi Students Union (KSU) ba kan pyllong ia ka Kyrsiew RI ha Khliehriat ryngkat ki kyndon.
U President ka Khasi Students Union (KSU) u samla Lambokstarwell Marngar ula ong ba ka jingpyllong ia ka Sngi Kyrsiew Ri ha East Khasi Jaintia Hills ka dei ban pyni sha ka pyrthei ba ki Khasi ki dei kawei ka jaitbynriew bad ka seng ka kwah ban leit sha man ki district Hynniewtrep ban pynkynmaw bad kyrsiew ia ki samla ka ri.
Mynta u snem ka KSU ka la jied ban pyllong ia ka sngi Kyrsiew Ri ha East Jaintia Hills bad kan sa leit iuhkjat sha man ki district ban pynkynmaw ba ka 4 tarik u Iaiong ka don la kajong ka Khana ha ka jaitbynriew ba u Syiem Tirot Sing ula pynbna thma pyrshah ia ka sorkar phareng ha kato ka por.
Na ka Kyrsiew Ri ka KSU, pjah slam ka thain Lad Rymbai ba khang lut ki dukan
