Shillong: U MLA ka Nongkrem u bah Ardent M Basaiawmoit ula ong ba u da kwah eh ba ka jylla kan kiew sha ka 10 ne 100 billion ha ka ioh ka kot hynrei ka jingkren ka sorkar kam dei ban long tang da ka ktien hynrei ka dei ban pyni da ki kam.
Haba shim bynta ha ka jingiathir halor ka jingkren u Lat hapoh ka iing dorbar mynta ka sngi, u bah Ardent ula ong ba u sngew triem ban iohi ba ka jylla Meghalaya ka dei kaba lai ha ka jingduk ha ka ri India.
Katkum ka sorkar MDA, ka buh thong ban pyllong ia ka Meghalaya kaban kot sha ka 10 billion dollar ha ka ioh ka kot ha 2028, hynrei haba phai sha kawei ka liang, katkum ka kaiphod 2023, ka Meghalaya ka wan balai ha ka jingduk bad ka jingduk ka long haduh 27.9 percent u dak ka jingduk bad ha u Naitung 2024 ba la dep, ka jingduk ka kot sha ka 6 percent kaba kham palat ia ka jingduk haba khein kyllum ha ka ri kaba long 3.2 percent.
Ka jingduk ha Meghalaya ka long 85 percent ki samla kim ioh kam kim ioh jam, bad haba peit ia ka jingkhein, ka long kaba sngew triem ba ka jylla kan kot sha kane ka thong kumba la kam ka sorkar.
Katkum ka kaiphod u CAG, ka ram ka la kot sha ka 73 percent hynrei ka sorkar ka iai pan ram bad ki paidbah ki kwah ban tip katno ka sorkar ka la shim ram haduh mynta bad katno ka la siew ia ka ram.
Ka jylla Meghalaya kam dei kaba khlain ban pynmih khajna hynrei ka shaniah tylli tylla ha ka jingisynei ka sorkar pdeng bad bun ki skhim pynroi ki dei jong ka sorkar pdeng kiba shu pyntreikam lem ka sorkar jylla.
Nga sngew kmen lada ka jylla kan kiew sha ka 10 ne 100 Billion dollar ha ka ioh ka kot: Ardent
