Shillong: Ka pule puthi ka dei ka aitiar ba donbor tam napdeng baroh ban ai bor ha u briew bad ban wanrah ia ka jingtip bad ka jingshai, khlem maka, ka shnong ne ka thain bad ka jaitbynriew kan ym lah ban kiew.
Dang shen, ka sorkar jylla ka la pyllait ia ka PGI ha kaba kawei na ki skul kaba sahdien tam ka don ha u lum bad ka mariang kaba itynnad ka West Khasi Hills. Kane ka skul ka dei ka Step by step LP Skul, Lawwahskei.
Ka shnong Lawwahskei ka don ha Nongstoiñ Block, bad ha ka Rambrai-Jyrngam konstitwensi ka West Khasi Hills District hapoh ka Myriaw Syiemship.
Ban poi sha kane ka shnong, ka shim por kumba 15 km ha ka surok sha Nongriat na lad Umlieh ha ka surokbah Shillong-Nongstoin.
Ngi la hiar sha katei ka shnong, ban twad jingtip ia ka jinglong kane ka skul bad ia ka roi ka par ha kane ka shnong bad la iakynduh bad uwei na kiba seng ia kane ka skul uba dei ruh u secretary ka Managing Committee u bah Fonder Wahlang.
Ia kane ka skul, la seng ha u 2006 bad kam pat ju ioh jingiarap eiei na ka sorkar lait noh ka skhim ban shna ia kawei ka kamra klas kaba la ai u MLA barim bah Kimfa S. Marbiang T. 3 lak tyngka ha 2021-22. La seng ia kane ka skul da ka jingmut ban kyntiew ia ka pule puthi ha ka shnong bad ha ka thain namar ba ka dei ka thain kaba dang sahdien palat.
U bah Fonder ula ong ba hapdeng kiba bun ki jingtynjuh hynrei kim iehnoh ban pyntyllun bad kawei kaba kham shem jingeh, ka dei namar ka jingbym lah ban siew ka tulop kumba kwah ki nonghikai namar ba kam pat ioh jingiarap eiei na ka sorkar bad kumta, bun ki mih noh haba ki ioh jingsiew kaba kham heh bad man ka por hap ban wad nonghikai biang. Ha ka jingshisha, ka la don ka jingthmu ban pynbha ia ka iing, ia ka madan bad kiwei kiwei ki jingdonkam hynrei kam shym la lah ban leh na ka jinghiran ka pisa.
Ha kane ka shnong, ka don sa kawei ka skul, ka Presbyterian LP Skul, kaba hap ha ka SSA kaba a i ka jingstad ia ki khynnah. La seng ia kane ka skul ha 1967 bad ka la kot 50 snem mynta
Ka Head-Teacher kane ka skul, ka kong Organise Wahlang ka la ong ba ka skul ka dang donkam shibun kum ka jingker ia ka phyllaw, ka library, kamra klas, ki nonghikai.
Kawei ka dei ka jingioh kot pule ha kaba ka sorkar ka ai tang kawei ka kot baroh shi klas, ym sha baroh ki khynnah.
Sahdien ka skul ha nongkyndong bym shim khia ka sorkar
