Shillong: Tang ka jingsngap paidbah ruh ym pat poi, ka la mih ka jingiapyni bor haduh ba ki pulit kila hap ban kawang lyer pynsat khmat ia ki paidbah ban pynpra na kaba ki ialum lymbung ban khang lad ia ki briew ka Meghalaya State Pollution Control Board
Kane ka la jia shisngi shwa ba ka public hearing kan long na ka bynta ban sngap ia ka sur u paidbah halor ka jingpan jingbit ka kompeni Shree Cement Ltd ban tih mawshun ha Lumsyrman, Daistong, kaba hap ha Nongkhlieh Elaka, East Jaintia Hills.
Ka jingiapyni bor ka mih hadien ba ki kynhun kiba pyrshah ia ka public hearing ki la pakhang ïa ki kali ki pulit bad ki kali ki briew ka Meghalaya State Pollution Control Board kiba thmu ban leit lypa sha ka jaka ba pynlong ïa ka public hearing.
Ka jingkawang lyer pynsat khmat ka la jia ha ka por kumba 3 shiteng mynsngi ha ka jaka ba la tip da ka Ïew Cement.
Ki nongshong shnong ka Shnongrim ki la khang lynti ïa ki kali pulit bad jong ki briew Meghalaya State Polution Control Board (MSPCB) kiba thmu ban leit sha ka public hearing jong ka Shree Cement shisngi shwa, ka ban long lashai ka sngi Thohdieng ha ka por 8 baje mynstep.
Kane ka kynhun ki nongshong shnong ki la pynphai ïa ki kali da kaba pynpaw ruh ba ka public hearing kadei lashai ka sngi, bad balei ki wan lypa mynta.
Ki paidbah ki pyrshah ïa ka public hearing namar ba ka kompani kam shym la ïakren pynbeit eiei halor kane ka kam bad ki nongrep bad la pynpaw ba kane kadei ka jingleh jubor ïa ka hok ki nongshong shnong khlem da ïakren ne pynbeit shwa bad ki nongshong shnong.