Shillong: U Waheh Shnong ka Lapangab, u bah Deimonmi Lyngdoh ula pynpaw ia ka jingsngewsih jur halor ka jingleh sting ka sorkar Meghalaya ia ka thain Lapangab kaba la wanrah ka jingsuhsat ia ki nongshong shnong.
Haba iakren bad ki lad pathai khubor mynta ka sngi ha Shillong, u bah Deimonmi ula pynpaw ba ka long kaba sngewsih kumno ki nongshong shnong ka Lapangab kin long mraw ha la kajong ka ri ban shah pyndik ha ki para ri nong India na Assam.
Katkum ka jingong u waheh chnong, naduh u snem 2023, ki paidbah kila shah pyndik ha ki briew na Assam haduh ba kila syier ban leit sha ki lyngkha rep bad ki lyngkha ruh ki shah pynjulor. Hadien bun snem ba kila shah pyndik ir shi ir, mynta ka sngi, kim banse ban wan kiew sha Shillong ban dawa na ka sorkar ban ai ka jingshngain.
Mynta ka por, ka la dei ka aiom ban pynkhuid ia ki niut ki nier ban soh bha u khaw u kba hynrei kim ioh lad satia namar ba kila shah pynthut bad shah pyndik.
U la ong ba ka sorkar Meghalaya ka dei ban iakren ia ka sorkar Assam ban weng noh ia ki ktem pulit Assam kaba don ha pynthor bad ban pyndam ia u GPS Line uba la buh dak da ka Assam, kat bym pat pynbeit ia u pud u sam.
‘Balei ngi long mraw ha ka jaka lajong’, ong u waheh chnong Lapangab
