Shillong: Da ki spah ngut ki nongshong shnong ka Lapangab kila wan tur sha Shillong hadien ba kila mad ia ka jingsohsat ha kine ki snem ban shah pyndik ha ki briew na Assam, kiba sah marjan shiliang u pud u sam, kiba wan ban pyndik man ka por.
Na ka jingjngai kaba kumba 100 km eiei, na khappud bad ka Assam, ki longkmie bad rangbah kynthei bad shynrang kila ieh ia ki kam ki jam, hapdeng ka jingeh ban wan ksam shkor ia ka sorkar.
Ka Lapangab ka don ha West Jaintia Hills hapoh ka Nartiang konstitwensi ha kaba u symbud myntri rangbah u bah Sniawbhalang Dhar ula mihkhmat ha kine ki phew snem bad u dei ruh u Chairman ka Regional Committee jong ka West Jaintia Hills sector kaba la thung ban pynbeit ia ka jingiaknieh pud hapdeng ka Meghalaya bad ka Assam.
Ha kane ka jingleit tur, ka la don ruh ka jingialymbub met bad ki briew ka sorkar, kiba khang lad ba kin leit tur sha Secretariat. Katkum ka jingiathuh ki rangbah katei ka shnong, ka jingsdang pyndik ki briew na Assam, ka la dei ha u snem 2023 ter ter haduh mynta.
Ka daw kaba la pyllong ia ki paidbah ban wan tur ka dei namar ba ki briew na Assam ki ju wan ban pyndik ban pynthut ia ki nongrep ba kin leit thung leit tep ha ki pynthor jongki. Kawei pat ka daw ka dei ka jingdon ka Police Outpost ka Assam ha u lum pynthor jongki, ha kaba kila dawa ba dei ban weng noh bad ban pyndam ia u GPS Line uba la buh dak da ka Assam, kat bym pat pynbeit ia u pud u sam.
Hadien ka jingwan tur jongki sha Shillong, ka sorkar jylla ka la kular ba kan buh noh ia ka ktem pulit ha pynthor, ym shuh hapdeng shnong khnang ba ki nongrep kin shngain.
Ha Lapangab shah pyndik ha ki pulit Assam, ha Shillong tyngkhuh bad ki pulit Meghalaya
