Shillong: Ka Inter State Bus Terminal (ISBT) ha Mawiong kan sa hui hui hai hai biang ban ioh rung ki bos bapher bapher na kylleng ki jylla kiba mih bad wan sha kane ka jylla hadien ba ka jingkieng thymmai, ha Damsite, la plie ha ka 13 tarik Jymmang 2026.
Ia ka jingkieng bad ka surok kaban iaid kia ria ka jingkieng rim ha Damsite, a shna ha ka jinglut kaba T. 23 klur na ka Special Assistance to State Capital Investment bad kumba shi snem ka la iaid haduh ban plie mynta.
U symbud myntri rangbah ka jylla u Bah Prestone Tynsong uba peit ia ka tnat PWD, u la plie ia ka Jingkieng kaba jrong 75 metre bad ka surok kaba pyniasoh ia kane ka jingkieng kaba 2.26 km.
La sakhi lang u MLA ka Umroi Bah Damanbait Lamare, u Commissioner & Secretary u Sanjay Goyal, u ki DC, SP ka Ri Bhoi bad East Khasi Hills, u Chief Engineer ka PWD u Bah W.R Lyngdoh, bad kiwei.
Lyngba ka jingplie ia kane ka jingkieng, ka surokbah na Damsite sha Shillong kan sa sawa ka sur ki kali heh kiba hapoh 10 taiar, kiban ioh ban wan kiew beit sak na Damsite sha Shillong, bad ki Nigt Super Bus kin ioh ban wan thep bad pynhiar briew haduh ISBT ha Mawiong, kaba la shu shong kynjah la palat snem mynta naduh ba ka sorkar ka la khang ban iaid kali heh na jingkieng Damsite kaba rim, namar ba kala synjor.
Yn hui hui biang ka ISBT Mawiong hadien ba la kynjah ba la dep ia ka jingkieng thymmai
