Shillong: Hadien ka jingap slem jong ki paidbah ka thain Wahrinong kaba hap ha Mawthadraishan konstitwensi, ka la urlong ha kane ka kynti.
U MLA ka Mawthadraishan u Bah Shakliar Warjri ha ka sngi Thohdieng ka 6 tarik Lber 2026 u la plie paidbah ïa ka Health Sub-Centre ha ka shnong Wahrinong ryngkat ka jingsakhi lang ki babu sorkar ka Eastern West Khasi Hills District, doktor ka Myriaw PHC, ki nurse, ki nongtrei ka tnad ka koit ka khiah bad ki paidbah nongshong shnong jong katei ka thaiñ.
La tei ia kane ka Health Sub-Centre ha ka jinglut kaba T.55.50 Lak ban ai ia ka jingshakri sha ki san tylli ki shnong ba kynthup ïa ka Wahrinong, Umjakoid, Mawpon, Dombah bad Marwir.
Ia ka jingïalang la pyllong ha phyllaw ka Sub-Centre ba la pyniaid u Bah N.S. Wanniang uba dei u Sordar ka shnong Wahrinong. La pynphuh pynphieng ïa ka jingïalang da ka jingrwai bad jingshad na ki khynnah skul jong ka Edmon Rice Higher Secondary School.
Nalor u Kongsan la ïoh ruh ki jingkren na u Bah Mayborn Diengdoh, MCS, Additional Deputy Commissioner ka Eastern West Khasi Hills District, DHMO jong ka Nongstoiñ, na ka liang ka BMHO Mawthadraishan Block, na u doktor ka Myriaw PHC u Dr. Raj Kamal bad na ka Village Health Council, Wahrinong.