Shillong: Ka Chief Electoral Officer (CEO), Meghalaya ha ka 5 tarik Lber 2026, ka la pyllong ia ka Electoral Literacy Club (ELC) ha Jawahar Navodaya Vidyalaya (JNV), Mawphlang, East Khasi Hills district shi bynta ka jingpynshai paidbah jong ka SVEEP ne ka Systematic Voters’ Education and Electoral Participation.
La pyllong ia kane da ka jingiatreilang ka ophis ka Deputy Commissioner bad ka Navodaya Vidyalaya Samiti, Shillong Region.
Haba kren ha kane ka prokram, u Chief Electoral Officer (CEO) u Dr. B. D. R. Tiwari ula ong ba ki samla ki dei ka lawei ka ri India bad ban pynkhlain ia ka ri synshar paidbah kaba heh tam ha ka pyrthei.
Haba iaroh ia ka rukom synshar u Khasi, u Tiwari u la ong ba haba u wan shimti nyngkong kum u heh sorkar ha Sohra, ula ioh lad ban leit peit ia ki jingialang ki dorbar shnong bad hangta ula kyndit ban shem ia ka rukom synshar paidbah kaba biang tam ha ki met tynrai ne grassroot, kaba la pyniar shuh ia u ban sngewthuh kham bha ia ka synshar paidbah.
U la ong ba ki dorbar shnong, dorbar hima, dorbar raid ki phalang ia ka nongrim ka synshar paidbah bad na kane ka daw, la ithuh kyrpang ha ka Sixth Schedule ka riti synshar ka ri India.
U la ong ba ka Electoral Literacy Club ha JNV Mawphlang kan long kum ka nongmuna sha kiwei ki skul ruh ban pynsngewthuh khambha ba kin shim bynta ha ka rukom synshar paidbah bad ka hok ban jied ha ki sngi ban sa wan.
Ha kajuh ka por, u la ong ba ka jingthmu ba kongsan ka Special Intensive Revision (SIR) ka long ban pynthikna ia ki kyrteng ki nongthep kan long kaba biang ban lait na kano kano ka jingkynrum kynram. U la ong ba ka SIR kam dei kaba leh dang mynta hynrei la ju leh ruh ha ki por ba mynshwa bad ula kyntu ia ki paidbah ban ym sngewthuh bakla ne ban sngew kulmar jingmut.
Ha kane ka sngi, la don lang ka Principal ka JNV Mawphlang ka Dr N. Sharma, u SVEEP Nodal Officer, u bah K. G. Nongrum, u Aditya Prakash Singh, ki khynnah skul bad ki nonghikai bad ki nongtrei ka JNV Mawphlang.
Mar syn shimti nyngkong ha Sohra, nga kyndit ban iohi ia ka synshar paidbah u Khasi: Tiwari
