Shillong: Shwa ban pyllong ia ka jingleit shong kyraiñ hakhmat u mot u Kiang Nangbah hakhmat ka Shillong Civil Hospital, mynta ka janmiet hadien ba la wai trei, ki nongtrei ki bank hapoh ka lama ka Meghalaya Joint Council of Trade Unions & Associations (MJCTU&A) ki la sdang shwa da ka jingïakhih ha phyllaw ka Meghalaya Co-operative Apex Bank kaba don ha Khyndailad.
Kane ka jingiakhih ka long ban ïasnohkti lang ryngkat ki 10 tylli ki Central Trade Unions ban pyrshah ïa ka jingthymmai jong ka sorkar Pdeng ïa ka Labour Law.
U Bah David Laloo u General Secretary ka Meghalaya Bank Employees Association u la ong ba ka sorkar kmie ka thmu ban pynkylla ïa ka Labour Law kaba don haduh 29 tylli ki aiñ bad tang na ka daw ban pynsuk na ka bynta ban leh ïa ka kam business ka sorkar pdeng kala pynmih sa 4 tylli ki Labour Code.
U la ong ba ki 10 tylli ki CTU kiba don haduh 28 tylli ki kynhun hapoh ka Ri India ka la khot ban pynlong ïa ka jingïakhih lashai ka sngi Palei ka 12 tarik u Rymphang 2026. Ha Shillong kin pyllong hajan u mot dur ba shi rynnieng u Woh Kiang Nangbah kaba don hajan Civil Hospital Shillong.
Ka Central Trade Unions ka pyrshah ia ka jingpynkylla ïa ka MGNREGA sha ka Viskit Bharat-Guarantee for Rozgar and Ajeevika Mission (Gramin) Act, 2025, ban dawa weng noh ïa ka Draft Seed Bill and Electricity Amendment Bill, ïa ka Sustainability Harnessing and Advancement of Nuclear Energy for Transforming India (SHANTI) Act, nalor kiwei kiwei.
Sdang shwa ki nongtrei bank na phyllaw ka Apex Bank shwa ban shong kyraiñ hakhmat u Mot Kiang Nangbah
