Shillong: U Symbud myntri rangbah ka jylla u bah Prestone Tynsong u la ong ba ki pulit ki iakynduh jingeh ban leit khang ia ki kam tih dewiong beain namar ba ka jaka ka long sha khlaw bah bad wat ki kali 4wheel ruh ki iaid haduh 3-4 kynta na surok ban poi sha katei ka jaka.
Kane ka jingjubab u symbud myntri rangbah ka long halor ka jingkylli ia ka jingbteng ka jingtih dewiong beain kaba la ialam ia ka jingiap haduh 27 ngut ki briew ha Mynsngat-Thangsko, East Jaintia Hills.
“Phi la iohi ba ngi la pyrshang da ka bor baroh bad ha kane ka jingjia (Thangsko), ka jia sha jngai bah shapoh khlaw ha kaba ka kali Four Wheel ka shim por 3-4 kynta na surok ban poi sha ka jaka ba tih dewiong bad kane ka dei ka jingeh ba ki pulit ki iakynduh”, la ong bah Prestone.
U bah Prestone ula ong ba ka sorkar kam ju peitkai haba don kano kano ka jingjia ba don ka jingtih dewiong beain bad ka la shim kam trait bad trait ia kiba donkti.
Ha kane ka aiom rang mynta, ka sorkar ka la bthah ban leh da kaba tyngeh ban khang beit sbak ia ka jingtih dewiong beain. Haduh mynta la kem 2 ngut ki trai par kiba donkti ha ka jingjia bad ki pulit ki dang thwet bad dang tohkit shuh shuh halor kane ka jingjia.
“Ia mynta bad ha kane ka aiom, ka sorkar ka la leh da kaba tyngeh ban pynthikna ba ki kam tih dewiong beain kin sangeh mardor”, u la ong.
Ia mynta ki pulit ki dang lah ban leh bad ym donkam ban pan jingiarap na ka sorkar India.
Haduh mynta ngi la kem 2 ngut, nga tharai ban ia batai lut kam long, namar ba ki pulit ki dang don ha ka kam ban thwet ban tohkit halor kane ka jingjia, ban wad katno ngut kiba donkti ki don ha ka kam tih dewiong beain.
Ha kajuh ka por ula iathuh ba ka sorkar kan thung ia ka Judicial Inquiry Commission halor ka jingjia ha Mynsngat-Thangsko, East Jaintia Hills.
Wat ka 4Wheel ruh ka iaid 3-4 kynta|Haba don ka jingjia ngim ju peit kai:Prestone
