Shillong: Ka sorkar jylla Meghalaya ka la rai ban thung da ka Judicial Inquiry Commission ban tih bniah ia ka jingjia ha Mynsngat-Thangsko, East Jaintia Hills.
Ia kane la pynbna u Myntri Rangbah ka jylla u Conrad K Sangma ha ka rynsan social media jong u. U Conrad ula ong ba ka jingthung ia ka Inquiry Commission kan long katkum ki kyndon ka Inquiry Commission Act.
Lah ban kdew ba kumba 29 ngut ki briew kila iap na ka jingbthei ka krem tih dewiong beain ha Mynsngat-Thangsko kaba la jia ha ka 5 tarik Rymphang 2026. Halor kane ka jingjia, ki pulit kila kem 2 ngut ki trai par dewiong, bad kila kurup ia u dewiong uba la lum thup ha kumba 21 tylli ki jaka ha katei ka thain East Jaintia Hills uba la kot sha ka 3,356 Metric Tonne.
Ki bor sorkar kila kurup ruh ia ki tiar ki tar kiba pyndonkam ban tih dewiong.
U Deputy Commissioner u Manish Kumar ka district ka East Jaintia Hills ka la pynjari da ka kyndon 163 ka BNSS, da kaba mana ban ialum briew sha katei ka thain Thangsko palat ia ka san ngut, la ai bor ia ki majistor bad ki pulit ban leit kem ia ki briew kiba donkti ha kane ka kam beain, ban kurup ia ki tiar ki tar kiba pyndonkam ban tih dewiong beain bad kiba ialeh pyrshah ia kane ka hukum kin shah tan ha ka ain.
Thung ka sorkar da ka Judicial Inquiry Commission ban tih bniah ia ka jingjia ha Thangsko
